ՀՀ Սփյուռքի նախարարության նախաձեռնությամբ կազմակերպված Հայաստան-Սփյուռք 5-րդ համաժողովի շրջանակներում Հայաստանի ազգային պատկերասրահում այսօր բացվեց ամերիկահայ նկարիչ Դանիել Վարուժան Հեճինյանի «Խաղաղության արվեստ» խորագրով անհատական ցուցահանդեսը՝ նվիրված Հայաստանի անկախության 23-րդ տարեդարձին և Հայոց ցեղասպանության 100-րդ տարելիցին:
Ազգային պատկերասրահի 3 սրահներում ցուցադրված 61 կտավներից 40-ը գրաֆիկական աշխատանքներ են, իսկ 21-ը՝ գեղանկարներ:
«Այս ցուցահանդեսը ևս մեկ անգամ ապացուցում է, որ մենք տաղանդավոր հայեր ունենք, որոնցից մեկը Դանիել Վարուժան Հեճինյանն է: Հետաքրքիր է նրա անունը: Այս մանկիկը, երբ ծնվեց, նրան կոչեցին Դանիել Վարուժան, և նա, կարծես թե, այդ անվանը հավատարիմ և մեր ամենատաղանդավոր բանաստեղծի գեներն իր մեջ կրելով՝ դարձավ նկարիչ: Եթե Դանիել Վարուժանը մեր ցավը գրչով ներկայացրեց, ապա Դանիել Վարուժան Հեճինյանն այն ներկայացնում է վրձնով: Իսկ ամենակարևորն այն է (Ցեղասպանությունից զատ), որ նա կարողանում է իր նկարներով, իր գույներով աշխարհին զարմացնել, պարտադրել, ԱՄՆ-ի նման մի երկրում ստիպել, որ հաշվի նստեն մեր արվեստի հետ: Մեր սիրելի Վարուժանի աշխատանքներում սեր կա, սեր է հորդում նրանցից»,- իր ողջույնի խոսքով նշեց ՀՀ սփյուռքի նախարար Հրանուշ Հակոբյանը:
Կարդացեք նաև
Դանիել Վարուժան Հեճինյանն էլ շնորհակալություն հայտնեց բոլոր այն մարդկանց, որոնք իրենց ներդրումն են ունեցել հայրենիքում այսպիսի մի ցուցահանդես կազմակերպելու գործում:
Ցուցահանդեսին ներկա էին նաև ՀՀ վարչապետ Հովիկ Աբրահամյանը, Սփյուռքի կազմակերպությունների ղեկավարներ և ներկայացուցիչներ, Հայաստանի հասարակական և քաղաքական գործիչներ, արվեստագետներ:
Ցեղասպանության 100-րդ տարելիցին նվիրված «Խաղաղության արվեստ» հավաքածուի կտավներից մեկը կոչվում է «Դարի ոճիրը», մյուսը՝ «Ցեղասպանությունից անկախություն»: Այն ներկայացնում է նախորդ դարի առաջին ցեղասպանությունը, հաջորդող ոճիրները, մարդկային անգթությունն ու անհանդուրժողականությունը:
Սիրանուշ ՀԱՅՐԱՊԵՏՅԱՆ
