Ապրիլի 24-ին՝ Հայոց ցեղասպանության հիշատակման օրը, ներկայացվեց 21-րդ դարում ստեղծված «Մատյան մարդասիրաց» ձեռագիրը, որն արտացոլում է «Ավրորա» մարդասիրական նախաձեռնության գործունեության ամբողջ ժամանակագրությունը: «Մատյան մարդասիրացում» ամեն տարի 365 բառով ներկայացվում են այդ տարվա «Ավրորայի» հերոսների եւ դափնեկրի պատմությունները, ինչպես նաեւ «Ավրորա» մրցանակի ունեցած ազդեցությունը:
Մաշտոցյան մատենադարանի տնօրեն Արա Խզմալյանի ձեւակերպմամբ, Մատենադարանի պատմությունը մարդկային բարոյական սխրանքների պատմություն է: Նա մասնավորապես հիշեց Հովհաննես Հուսյան Վարդապետին, որը Հայոց ցեղասպանության տարիներին հազարավոր ձեռագրերին զուգահեռ փրկել էր բազմաթիվ մարդկային կյանքեր:
Կարեւորելով «Ավրորա» մարդասիրական նախաձեռնությունը՝ նա նշեց, որ Մատենադարանի եւ նախաձեռնության համատեղ նպատակի դրսեւորում է «Մատյան մարդասիրաց» ձեռագրի ստեղծումը, որին մասնակցում են մի շարք շնորհալի պատանիները:
Ավրորա» մարդասիրական նախաձեռնության Ստեղծագործական խորհրդի նախագահ Մարինե Ալեսի խոսքով, ստեղծված լինելով Հայոց ցեղասպանությունը վերապրածներ անունից եւ ի երախտագիտություն նրանց փրկողների՝ «Ավրորա» մարդասիրական նախաձեռնությունն իր գործունեության 8 տարիների ընթացքում դարձել է մարդասիրության յուրօրինակ ուղենիշ , այն վերափոխել է ավելի քան 3 միլիոն մարդու կյանք՝ աշխարհի տարբեր անկյուններում:
Կարդացեք նաև
Ինչ վերաբերվում է Երեւանի Մատենադարանում ստեղծված «Մատյան մարդասիրացին», այն տիկին Ալեսի խոսքով, «Ավրորա» մարդասիրական նախաձեռնության արտացոլումն է, սերունդների կապի ու պատմության հարատեւման ապացույցը: «Ավրորա Մարդիգանյանը խիզախության եւ վերածննդի խորհրդանիշ է, որի մասունքներն ամփոփված են Կալիֆորնիայի ընդհանուր գերեզմանատներից մեկում: Կարեւոր է, որ նա ի վերջո իր հանգրվանը գտնի Հայաստանում, եւ այստեղ լինի նրա հուշակոթողը՝ ի նշան մեր անսահման երախտագիտության»,-հավելեց նա:
Հուշակոթողի հեղինակ, քանդակագործ Վիգեն Ավետիսը նշեց, որ այն ստեղծելիս քանդակի մեջ ամբողջացրել է այդ փխրուն կնոջ եւ համաշխարհային պատմությունը: Ի դեպ, հուշակոթողն ունի 2 կողմ՝ մի կողմում Ավրորան է եւ այն դժոխքը որի միջով անցել են այդ կինն ու հայ ժողովուրդը, մյուս կողմում՝ փրկության լույսը:
Գոհար ՀԱԿՈԲՅԱՆ
