Ֆինանսների նախարարության հարկային ծառայության քննչական մարմինների կողմից այսօր ձերբակալված նախկին պատգամավոր Հակոբ Ռաֆիկի Հակոբյանը մեղադրվում է ապօրինի ձեռնարկատիրության համար: Այդ են վկայում ֆիննախի հրապարակած հոդվածները:
Նախկին պատգամավորին մեղադրանք է առաջադրվել ՀՀ քրեական օրենսգրքի 188-րդ հոդվածի 3-րդ մասի 1-ին կետով: Այսինքն, ըստ մեղադրանքի, Հակոբ Հակոբյանը ապօրինի ձեռնարկատիրությունը զուգորդել է անձանց կամ կազմակերպություններին կամ պետությանն առանձնապես խոշոր չափի վնաս պատճառելով:
Նրան առաջադրված Քրեական օրենսգրքի 205-րդ հոդվածով էլ, նախկին պատգամավորը խուսափել է վճարել գանձվող հարկերը, տուրքերը կամ այլ պարտադիր վճարները:
Սույն հոդվածի առաջին մասը սահմանում է. «Գանձվող հարկերը, տուրքերը կամ այլ պարտադիր վճարումները վճարելուց խուսափելը՝ հաշվապահական գրքերում կամ հարկման հիմք համարվող այլ փաստաթղթերում ակնհայտ խեղաթյուրված տվյալներ մտցնելու միջոցով, որը կատարվել է խոշոր չափերով՝ պատժվում է տուգանքով՝ նվազագույն աշխատավարձի հինգհարյուրապատիկից հազարապատիկի չափով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը հինգ տարի ժամկետով, կամ կալանքով՝ երկուսից երեք ամիս ժամկետով, կամ ազատազրկմամբ՝ առավելագույնը երկու տարի ժամկետով»:
Կարդացեք նաև
Նկատենք, որ այս հոդվածում խոշոր չափ է համարվում հանցագործության պահին սահմանված նվազագույն աշխատավարձի հազարապատիկը գերազանցող գումարը:
Լուսինե ԲՈՒԴԱՂՅԱՆ
