Դատավոր Գագիկ Պողոսյանի նախագահությամբ այսօր շարունակվեց «Ֆինանսական բուրգի» գործով մեղադրվող տարադրամի փոխանակման կետի նախկին աշխատակից Արթուր Անդրեասյանի դեմ հարուցված քրեական գործի դատաքննությունը:
Դատարանը տուժողներ Գեւորգ Թադեւոսյանին, Արտակ Գալստյանին եւ Էդուարդ Ներսիսյանին ճանաչեց հայցվորներ, իսկ ամբաստանյալին՝ քաղաքացիական պատասխանող, բացատրելով կողմերի դատավարական իրավունքներն ու պարտականությունները:
Արտակ Գալստյանի ներկայացուցիչը հայտնեց, որ իրենց հայցի հիմքում ընկած են գույքային իրավունքներ, խնդրեց, որպեսզի դատարանը քննության չառնի հայցը, քանի որ իրենք քաղհայց կներկայացնեն:
Կարդացեք նաև
Գեւորգ Թադեւոսյանի պահանջը՝ 13 մլն 530 հազար դրամ էր, որի դեմ չառարկեց ամբաստանյալը, ասելով, որ կվերականգնի անկախ ամեն ինչից: Երրորդ տուժողը բացակա էր, դատավորը ներկայացրեց նրա հայցապահանջը՝ 48 մլն 209 հազար 520 դրամ:
Հրապարակվեց Ասյա Գեւորգյանի միջնորդությունը, որը խնդրել էր, որ կալանքից հանվի Փափազյան 11 շենքի 60 բնակարանը, ինչին առարկեց Արտակ Գալստյանի ներկայացուցիչը, ասելով, թե այս բնակարանի նկատմամբ նշանակված կա նախնական դատական նիստ եւ հնարավոր է, որ դատական ակտի ժամանակ նոր երեւան եկած հանգամանք ի հայտ գա, իսկ դատախազ Արթուր Երիցյանը կողմ էր, որ կալանքը հանվի: Կողմ էր նաեւ ամբաստանյալը:
Այս գործով փոխարժեքների հաշվարկը մեկ անգամ եւս ճշտելու համար ժամկետ խնդրեց դատախազը եւ հաջորդ դատական նիստը նշանակվեց մայիսի 26-ին:
Հիշեցնենք, որ «Ֆինանսական բուրգ» անվանումն էր ստացել այս գործը նրա համար, որ բարձրաստիճան մի շարք պաշտոնյաներ Արթուր Անդրեասյանի տարադրամի փոխանակման կետում մեծ գումարներ էին շրջանառության մեջ դրել:
Ռուզան ՄԻՆԱՍՅԱՆ
