Ձերբակալվել է ԽՍՀՄ նախկին պատգամավոր, ԱԺ նախկին պատգամավոր, 73-ամյա Գոհար Ենոքյանը: Նրա մոտից՝ Էրեբունու ոստիկանության ժամանակավոր պահման վայրից դուրս եկած նրա պաշտպանը՝ Գեղամ Հակոբյանն (լուսանկարում) Aravot.am-ին ասաց, որ Գ.Ենոքյանը կասկածվում է սպանության նախապատրաստման մեջ մասնակցություն ունենալու համար:
Aravot.am-ի տեղեկություններով, խոսքն ԱԺ պատգամավոր, նախկին բարգավաճական Կարո Կարապետյանի «սպանության » նախապատրաստման մասին է, «Յուվեցի Կարո» անունով հայտնի պատգամավորը ոստիկանություն հաղորդում տվողն է:
«Մեր համոզմամբ ակնհայտ անհիմն են նշված կասկածները, ձերբակալման որեւէ հիմք գոյություն չունի: Հատուկ քննչական ծառայությունը թույլ է տալիս բացահայտ ապօրինություն, տեղի չունեցած դեպքով, անձին ապօրինաբար զրկում են ազատությունից, առանց բավարար հիմքերի»,-ասաց Գ. Հակոբյանը:
Ըստ Գ.Հակոբյանի՝ Գոհար Ենոքյանը որեւէ առնչություն չունի այդ դեպքի հետ. ավելին, նման դեպք իրականության մեջ տեղի չի ունեցել: Բացի այդ, Գոհար Ենոքյանը շուրջ մեկ տարի տևող նախաքննության ընթացքում որևէ անգամ չի հրավիրվել հարցաքննության և այսօր, ծանուցագրով նշված ժամին ներկայանալով ՀՀ հատուկ քննչական ծառայություն, ապօրինաբար, առանց բավարար հիմքերի ձերբակալվել է: Պաշտպանի գնահատմամբ, դա հորինված եւ պատվիրված սցենար է, որը ջանասիրաբար հովանավորվում է գլխավոր դատախազության և հատուկ քննչական ծառայության կողմից:
Կարդացեք նաև
Փաստաբան Գեղամ Հակոբյանն ասաց, որ հաշվի չեն առել նաեւ, որ 73-ամյա կինը Հայաստանի համար մեծ ներդրում ունեցող գործարար է. «Նպատակը նրա ունեցվածքը ապօրինաբար զավթելն է: Այս ամենի մասին միանշանակ տեղյակ է ՀՀ գլխավոր դատախազությունը, քանի որ մեր կողմից բազմաթիվ բողոքներ և միջնորդություններ են ներկայացվել այդ մարմնին՝ հույս ունենալով, որ ի վերջո դատախազությունը վեր կկանգնի պատվերներ կատարելուց և կկանխի ապօրինությունները: Օբյեկտիվության առումով նաև մեծ հույս էինք կապում ՀՀ հատուկ քննչական ծառայության հետ, սակայն այսօր այդ մարմինը խորապես հեղինակազրկեց իր անունը, 73- ամյա բազմավաստակ կնոջն ապօրինի ձերբակալելով»:
Գ. Ենոքյանի ինքնազգացողությունը լավ չէր, նա ուներ արյան ճնշման հետ կապված խնդիր:
Ռուզան ՄԻՆԱՍՅԱՆ