Հունիսի 11-ի երեկոյան շուրջ կես ժամ՝ 21.58-ից մինչեւ 22. 27-ը տեղացած կարկուտը վնասներ է պատճառել Տավուշի մարզի Նոյեմբերյանի տարածաշրջանի Արճիս, Լճկաձոր, Այրում, Հաղթանակ, Բագրատաշեն, Բերդավան բնակավայրերին: Կարկտահարության պատճառած վնասները շատ մեծ են Արճիս, Լճկաձոր գյուղերում եւ Այրում քաղաքում:
Համացանցում տարածվել են ոչ պրոֆեսիոնալ կերպով նկարահանված կադրեր, որտեղ երեւում են հավի ձվի մեծության եւ նույնիսկ ավելի մեծ չափի սառցե գնդեր: Կարկտահարությունից հետո բնական տարերքից տուժած բնակավայրերում ստեղծվել են տեղական հանձնաժողովներ, որոնք հաշվարկել են պատճառված վնասների չափերը: Վնասների վերաբերյալ տվյալները ուղարկվել են Տավուշի մարզպետարան:
Մարզպետարանի աշխատակազմի գյուղատնտեսության եւ բնապահպանության վարչության պետ Վաղարշակ Սուքոյանը հայտնեց, որ Արճիսում, Լճկաձորում եւ Այրումում ցանքատարածությունների եւ պտղատու այգիների բերքն ամբողջությամբ ոչնչացել է: Նա ասաց,որ իրենք դրա մեջ համոզվել են այդ գյուղեր կատարած այցի ժամանակ: Ըստ տեղական հանձնաժողովների կատարած հաշվարկների՝ Արճիսում կարկտահարության պատճառած վնասը 244 միլիոն, Լճկաձորում՝ 40, Այրումում՝ 15 միլիոն դրամի չափ է:
Վերոհիշյալ 3 բնակավայրերում կարկտի հարվածներից բազում տների տանիքների ազբոշիֆերներ, տների եւ ավտոմեքենաների ապակիներ, ջերմոցների ծածկեր են ջարդվել; Դրանց վնասների գումարները նշված չեն կարկտահարության վնասների մասին վերոհիշյալ ակտերի մեջ: Վ. Սուքոյանն ասաց, որ Լճկաձորում եղել է 1000-ից ավելի մեղվաընտանիք: Կարկտահարության պատճառով դրանցից մեղուները դուրս են եկել եւ ամբողջությամբ ոչնչացել:
Կարդացեք նաև
Լճկաձորում ոչնչացել է նաեւ 600 քառակուսի մետր մակերեսով ջերմոց: Նա հայտնեց, որ առաջիկայում Տավուշի մարզպետարանի հանձնաժողովը կլինի Հաղթանակ, Բերդավան, Բագրատաշեն գյուղերում եւ կպարզի, թե այդ գյուղերի տեղական հանձնաժողովների կողմից կազմված, կարկտահարության վնասների մասին տեղեկանքների տվյալները որքանով են համապատասխանում իրականությանը: Դրանից հետո կարկտահարության վնասների վերաբերյալ բոլոր տվյալները կներկայացվեն ՀՀ տարածքային կառավարման եւ արտակարգ իրավիճակների նախարարություն:
Նոյեմբերյանի տարածաշրջանում կարկտահարությունը եւս մի անգամ բացահայտեց խոցելի տեղերը՝ այդ տարածքներում հակակարկտային կայանների բացակայությունը եւ գյուղատնտեսության ոլորտում ապահովագրության չլինելը:
Ոսկան ՍԱՐԳՍՅԱՆ
