Այսօր Գյումրիում հոսանքի թանկացման դեմ հանրահավաք –երթի մասնակիցները Թատերական հրապարակից Շիրակի մարզպետարանի շենքի մոտ հասնելուն պես բացականչեցին. «Հասանք վերին իշխանություններին, բայց էդքան էլ վերեւ չեն , հիմա կիջնեն»:
Մարզպետարանի շենքը շրջափակել էին ոստիկանները, այստեղ էր եկել նաեւ Շիրակի նոր ոստիկանապետ Գրիգոր Ամիրխանյանը՝ իր նորանշանակ տեղակալ Վահրամ Ենոգյանի հետ: Երիտասարդների մի մասը փորձեց նստացույց անել, ոստիկանները իրար խառնվեցին ու խոչընդոտեցին:
Կարդացեք նաև
Վայրկյաններ անց ներքեւ իջավ Շիրակի մարզպետարանի ողջ աշխատակազմը՝ վարչության պետերը փոխմարզպետ Սեյրան Պետրոսյանի, աշխատակազմի ղեկավար Խաչատուր Պողոսյանի ու Շիրակի մարզի ՀՀԿ կառույցի պատասխանատու Սահակ Մինասյանի գլխավորությամբ: Բողոքավորների մի մասը հորդորում էին արագ հեռանալ, որովհետեւ մարզպետարանում անելիք չունեն, ըստ նրանց, այս ամենի մեղավորը Սերժ Սարգսյանն ու նրա դրածոներն են: Սակայն հետաքրքիր զրույց ծավալվեց նստացույցի փորձ արած երիտասարդների ու մարզպետարանի պաշտոնյաների միջեւ:
Տնտեսագետ Կարեն Պետրոսյանը Շիրակի փոխմարզպետ Սեյրան Պետրոսյանին հարցրեց, թե ո՞նց է պատկերացնում լուծումը, երբ Շիրակի մարզը թաղված է աղքատության մեջ, իսկ սա նշանակում է մարդկանց սովի դատապարտել: Մի երիտասարդ էլ կողքից նախատում էր՝ ասելով՝ ինչո՞ւ եք զոռով մեզ վռնդում երկրից: Շիրակի փոխմարզպետը, տեսնելով բորբոքված, սակայն իրավացի պահանջ ներկայացնող երիտասարդներին, նրանց փոխանցեց, որ ինքը ուշադիր լսեց ու որպես տարածքային կառավարման մարմին՝ բոլոր պահանջները կներկայացնեն պատկան մարմիններին:
Մի տարեց տղամարդ էլ, մոտենալով Շիրակի մարզպետարանի աշխատակազմի ղեկավար Խաչատուր Պողոսյանին, նեղվեց. «Ժողովրդին ստրուկի տեղ են դրել, ծիրանը արդեն ոտքի տակ է գնում, իսկ ես չեմ կերել, իսկ Սերժիկի կնիկը կերել է…»: Աշխատակազմի ղեկավարը, վատ զգալով ու կարմրելով պապիկի խոսքերից, ասում էր, թե դուք ի՞նչ գիտեք, ով, ինչ է կերել: Նրան հորդորում էր ձեռքերով չխոսել:
Նունե ԱՐԵՎՇԱՏՅԱՆ
