«Թրանսփարենսի Ինթերնեշնլ» հակակոռուպցիոն կենտրոնի իրավախորհրդատու Հերիքնազ Տիգրանյանը «Մեդիա կենտրոնում» ասաց, որ հանրաքվեն դիտարկում է «Քաղաքացի դիտորդ» նախաձեռնությունը, որի մեջ ներառված են 4 հասարակական կազմակերպություններ: Նրա խոսքերով ունեն շուրջ 1000 դիտորդներ, որոնք տեղաբաշխված են մոտավորապես 500 տեղամասերում: «Անկեղծ ասած, այսպիսի պատկեր չէինք սպասում, գոնե ես, որպես ընտրությունների մեջ որոշակի փորձ ունեցող` մտածում էի, որ մի փոքր ավելի մեղմ մեթոդների կդիմեն: Բայց այսօրվա քվեարկությունը եւ մինչեւ այս պահը ունեցած ահազանգերը ցույց են տալիս, որ մենք նորից հետ ենք գնում մեզ հայտնի լցոնումների, դիտորդների նկատմամբ ճնշումների փորձին»:
Նա նշեց, որ շատ մեծ ահազանգներ ստացել են ժամը 10:00-ից սկսած` ցուցակների մեջ ստորագրության առկայության մասին, այսինքն` ընտրողները եկել են ընտրատեղամաս եւ տեսել, որ իրենց անվան դիմաց ստորագրված է:
«Զանգ ստացանք 10/15 ընտրատեղամասից. մի քաղաքացի, որը չներկայացավ, բայց շատ վրդովված հայտնեց, որ ընտրացուցակում գրանցում կատարելու պահին նկատել է, որ հանրապետությունից բացակայող իր եղբոր եւ կնոջ փոխարեն գրանցամատյանում արդեն ստորագրված է եղել: Մենք ունենք մի ահազանգ, որը նաեւ տեսագրված է, երբ որ հանձնաժողովի անդամը 3/6 տեղամասում ինչ որ հանդարտ մի պահի լրացնում է ընտրողների ցուցակները եւ սեղանի տակ ունեցած իր թղթով կարծես համադրում է այդ տվյալները: Այստեղ ողջամիտ է այն կասկածը, որ հանրապետությունից բացակայող անվան փոխարեն պետք է ստորագրվեր, քանի որ նրանք ամենայն հավանականության չեն գա եւ չեն մասնակցի հանրաքվեին»,-ասաց Հերիքնազ Տիգրանյանը:
Նա նաեւ նշեց, որ դեռ տեղամասերը չբացված դիտորդներին տեղեկացրել էին հանձնաժողովականները, ահաբեկել, որ ձեզ միեւնույն է թույլ չենք տալու մոտենալ ընտրողների ցուցակներին. «Որոշ տեղամասերում չեն թողնում անգամ ընտրողը ընդհանրապես մոտ գա ընտրողների ցուցակի սեղանին եւ պահում են որոշակի հեռավորության վրա»:
Կարդացեք նաև
Անուշ ՄԱԹԵՎՈՍՅԱՆ
Լուսանկարը՝ «Մեդիա» կենտրոնի
