«Բարգավաճ Հայաստան» կուսակցության Նոր Նորքի տարածքային կառույցը կանդրադառնա կրկնակի քվեարկություն կատարած ԲՀԿ-ական Նարինե Հովհաննիսյանի քայլին: Մեր հարցին, թե հնարավո՞ր է նրան հեռացնեք կուսակցության շարքերից, ԲՀԿ առաջնորդ Նաիրա Զոհրաբյանն ասաց՝ տարածքային կառույցը պարտավոր է ու կանդրադառնա այդ հարցին:
Հիշեցնենք, որ Նոր Նորքի 9-րդ զանգվածի թիվ 119 նախնական ուսումնական հաստատությունում տեղակայված 2/32 ընտրատեղամասի հանձնաժողովի անդամ Նարինե Հովհաննիսյանին մեղադրանք էր առաջադրվել` 2015 թվականի դեկտեմբերի 6-ին կայացած ՀՀ սահմանադրության փոփոխությունների հանրաքվեի ժամանակ երեք հոգու փոխարեն քվեարկելու համար: Նա դատարանում ընդունել է իր մեղքն ու տուգանվել 500.000 դրամով:
«Եթե ընդունած չլիներ իր մեղքը, եւ դա լիներ զրպարտանք, ես կդատապարտեի զրպարտողին ու ամեն ինչ կանեի վերականգնելու մեր կուսակցի բարի համբավը, պատիվն ու արժանապատվությունը, որովհետեւ մեր կուսակցականները սահմանադրական հանրաքվեի օրը մեկ հանձնարական էին ստացել՝ տեղամասերում ապահովել ընտրությունների ազատ ու արդար ընթացքը: Բայց եթե ընդունել է, որ կատարել է զեղծարարություն, անկախ նրանից՝ ով է կատարել զեղծարարություն՝ իմ կուսակիցը, թե ամենամտերիմ բարեկամը, ինձ համար դատապարտելի է»,- ասաց տիկին Զոհրաբյանը:
Մեր հարցին՝ ի՞նչն է ստիպել ձեր կուսակցին դիմել կեղծարարության, տիկին Զոհրաբյանը պատասխանեց. «Դուք՝ որպես լրագրող, բոլոր հնարավորություններն ունեք նրան դիմել ու ստանալ պատասխանը»:
Կարդացեք նաև
Արփինե ՍԻՄՈՆՅԱՆ
