2017 թ. փետրվարի 10-19-ը Լոս Անջելեսում կկայանա RACHFEST-2017 փառատոնը, որը Միացյալ նահանգներում Հայաստանն ու հայկական մշակույթը ներկայացնելու բացառիկ հնարավորություն է: RACHEST 2017-ը կմեկնարկի Glendale Community College-ի Արվեստի եւ երաժշտության դեպարտամենտի աջակցությամբ ու համագործակցությամբ: Փառատոնի 10-օրյա ծրագրում ներառված են Հայաստանի ժամանակակից նկարիչների ցուցահանդեսներ՝ Հայաստանի նկարիչների միության նախագահ Կարեն Աղամյանի նախաձեռնությամբ:
Ինչպես Aravot.am-ի հետ զրույցում նշեց Հայաստանի պետական կամերային երգչախմբի տնօրեն Արմեն Արաբյանը, Հայաստանի պետական կամերային երգչախումբը եւս ներկայացված կլինի փառատոնին, նախատեսված է նաեւ սիմֆոնիկ համերգ, որի ընթացքում կհնչեն հայ կոմպոզիտորների երկեր: Միջոցառմանը հետաքրքրություն եւ աջակցություն են ցուցաբերել նաեւ մի քանի տեղական հայկական կազմակերպություններ, այդ թվում` Համազգային հայ կրթական և մշակութային միության ԱՄՆ-ի մասնաճյուղը:
RACHFEST-2017-ի գլխավոր իրադարձությունը Ռախմանինովի անվան միջազգային երաժշտական փառատոնն է, որին կմասնակցեն երիտասարդ դաշնակահարներ՝ աշխարհի տարբեր երկրներից: Նրանք կպայքարեն $ 25 000-ի չափով սահմանված մրցանակների համար:
Փառատոնի վերջին ակորդը կկայանա Գլենդելի Ալեքս թատրոնում, այն բացառիկ համերգ կլինի՝ սիմֆոնիկ նվագախմբի մասնակցությամբ:
Կարդացեք նաև
Իմիջիայլոց, նախորդ տարիներին փառատոնը անցկացվել է ԱՄՆ այլ քաղաքներում՝ արժանանալով տեղական մամուլի դրական արձագանքներին: RACHFEST-ի մանրամասների ու պատմության մասին զետեղված է rachfest.org պաշտոնական կայքում:
Գոհար ՀԱԿՈԲՅԱՆ
