Ժամկետային զինծառայող Անդրեյ Վարդումյանը արդեն 1 ամիս է բուժում է ստանում «Էրեբունի» բժշկական կենտրոնում: Հրազենային վիրավորում ստացել է քառօրյա պատերազմի առաջին օրը՝ Մարտակերտում:
Անդրեյը ողնաշարի վնասվածք ունի, տեղաշարժվել չի կարողանում: Ասում է, հիմա իրեն լավ է զգում, բայց նաև հավելում. « երկու օր առաջ գայիք, դժվար թե կարողանայի խոսել»:
Զինվորին ամեն օր զանգում են ընկերները. «Շատ բան չեն պատմում, բայց դե ես գիտեմ էնտեղ ինչ է կատարվում»:
«Էրեբունի» ԲԿ-ն վերջին մեկ ամսում 9 վիրավոր է ընդունել։ Երկուսն արդեն դուրս են գրվել հիվանդանոցից, 3-ը բաժանմունքում են: Իսկ 4 վիրավոր գտնվում է վերակենդանացման բաժանմունքում: Նրանց վիճակը դեռ ծանր է գնահատվում:
Կարդացեք նաև
«Մեկը միացված է արհեստական շնչառության սարքին, երեքը՝ ինքնուրույն են շնչում: Երկու զինվոր ունենք, որ ողնաշարի վնասվածք ունեն, իհարկե մենք պայքարում ենք, որ իրենք շուտ ապաքինվեն, բայց դա շատ դժվար է»,- ասում է «Էրեբունի» ԲԿ գործադիր տնօրեն Միքայել Մանուկյանը:
Ստեփանակերտցի Արթուր Արզանգուլյանը գրեթե մեկ ամիս հիվանդանոցում անցկացնելուց հետո այսօր դուրս է գրվելու հիվանդանոցից: Դիրքեր է բարձրացել լարվածության հենց առաջին օրը՝ կամավոր: Բեկորային վնասվածքներ ունի, բայց ժամերն է հաշվում, որ կրկին բարձրանա դիրքեր. «Էդ մեր հողն ա, պետք ա պաշտպանենք, պահենք»:
Մանրամասներին կարող եք ծանոթանալ` «Ա1+»-ի տեսանյութում
