Տավուշի մարզպետ Հայկ Ղալումյանը Կիրանցում հանդիպեց բնակիչների հետ:
Ճանապարհը փակած մարդիկ բացատրեցին, թե ինչի համար են պայքարում՝ «չենք ուզում մեր ապրած հողի վրա ադրբեջանցի գա»:
Մարզպետն ասաց. «Քո կարծիքով, նաեւ ինձ ճանաչելով՝ ո՞նց եք պատկերացնում դա: Քարտեզով տենանք, որը ոչ իմ պապն է գծել, ոչ քո պապն է գծել, հասկանանք ինչ է ընկնում, գանք ասենք՝ ժողովուրդ ջան, ընկնում է այս մի հատվածում, կամ չի ընկնում: Մինչեւ առ այս պահը ժողովրդից թաքցրած ոչ մի բան չկա: Ես ձեզ հետ 7-8 ժամով նստել եմ, խոսացել, կատակ արել: Համլետ ջան, մենք վերջնական էդ պատկերացումը չունենք»: Բնակիչ Համլետը ու մյուսները սկսեցին վիճել, թե՝ եթե ոչ մի բան որոշված չի, ինչո՞ւ են սյուներ տեղադրել:
Ղալումյանն ասաց. «Հայտարարվել է, կառավարության կայքում էլ կա, որ սահմանագիծը 91-ի քարտեզի հիման վրա է որոշվելու: Եկել եմ, ասել եմ՝ ժողովուրդ ջան, իզուր մի վրդովվեք, ձեր պատկերացումները, որոնք գոյություն ունեն ու ձեր փաստաթղթերը, որոնք կան, հիմնավոր են, ես անձամբ ներկայացնում եմ հանձնաժողովին»:
Կարդացեք նաև
Ղալումյանն ասաց, թե ժողովրդի հետ պայմանավորվել է, խոսել է, հետո եկել տեսել՝ ճանապարհը փակել են. «Էսօր կառավարության մակարդակով ամեն ինչ արվում է, որ այս հարցը լուծվի»: Կիրանցի բնակիչները վրդովված էին, ասում էին՝ «մենք մեր ճամփեքը ու մեր սահմանը լավ գիտենք, էդ ձորերում ենք մեծացել, մենք մանկություն ենք ապրել էստեղ, պատմություն ունենք, ցավներդ տանեմ»:
Համլետը, դիմելով մարզպետին, ասաց. «Մենք պատրաստ չենք առավոտը արթնանանք, տեսնենք Ադրբեջանի դրոշը մեր աչքի դեմը, էս գյուղի խնդիրը սա է»:
Հռիփսիմե ՋԵԲԵՋՅԱՆ
