Այսօր ԱԺ առողջապահության, մայրության եւ մանկության հարցերի եւ ֆինանսավարկային եւ բյուջետային հարցերի հանձնաժողովների համատեղ նիստում քննարկվեց առողջապահության նախարարության 2015-ի բյուջեի կատարման հաշվետվությունը: Այն ներկայացրեց առողջապահության փոխնախարար Վահան Պողոսյանը:
ՀՀԿ պատգամավոր Մկրտիչ Մինասյանը հարցրեց՝ «Օնկոլոգիական հիվանդությունները հետազոտող ինստիտուտն ի՞նչ վիճակում է, մեկը որ, Աստված ոչ անի, հիվանդանում է, ինչ ունեն-չունեն, տուն ու տեղ ծախում են՝ գնում եվրոպաներ, գոնե այդ կենտրոնն ունենանք, մեր ժողովրդի վիճակը արդյունավետ կարողանանք լուծել»:
Փոխնախարարը պատասխանեց. «Ուռուցքաբանության կենտրոնի հետ կապված աշխատանքները շարունակվում են, տեղադրված է արդեն արագացուցիչը: Մենք այս տարվա վերջում նախատեսում ենք բացել»:
Կարդացեք նաև
ՀՀԿ պատգամավոր Կարեն Ավագյանն էլ ասաց, որ անհասկանալի է, թե մասնավոր բուժհիմնարկներում գնագոյացումն ինչպես է լինում: Փոխնախարարը պատասխանեց, որ օրենսդրական խնդիր է գների կառավարումը. «Մենք չենք կարող շուկայում գին կառավարենք, պետք է ունենանք մրցակցություն: Եթե ուզենանք կարգավորել մասնավոր հատվածի գները՝ օրենսդրորեն չենք կարող, իսկ պետական հիմնարկներինը Երեւանում կարգավորում է քաղաքապետարանը, մարզերում՝ մարզպետարանը: Մենք չենք կարգավորում»:
Հռիփսիմե ՋԵԲԵՋՅԱՆ
