Իրանագետ Վարդան Ոսկանյանի համոզմամբ, Իրանում նախագահական ընտրություններին հիմնական պայքարը կգնա բարեփոխիչների առաջնորդ, գործող նախագահ Հասան Ռոհանիի եւ պահպանողական Էբրահիմ Ռաիսիի միջեւ:
«Հիմնական պայքարը ծավալվելու է այս երկու թեկնածուների միջև: Այս փուլում բավականին բարդ է կանխատեսել ֆավորիտներից որևէ մեկի հաղթանակը, որովհետև սոցհարցումների արդյունքում նրանց հնարավորությունները գրեթե հավասար են: Բայց իրանցի ընտրողը չափազանց անկանխատեսելի է և հաճախ է փոխում իր որոշումները: Այնպես որ, ամեն ինչ վճռվելու է հենց ընտրության օրը»,- այսօր «Հայելի» ակումբում ասաց իրանագետը:
Նա նկատեց նաեւ, որ հարեւան Իրանում, ի տարբերություն Հայաստանի, ընտրություններին ձեւավորվել է բանավեճային մշակույթը, ինչի մասին վկայում են թեկնածուների բանավեճերը ու քաղաքական տեխնոլոգիաների կիրառումը.
«Ինչ վերաբերում է հայկական համայնքին, ապա նա ազատ է իր կամարտահայտության հարցում: Այդուհանդերձ, շատերի համակրանքը գործող նախագահի կողմն է, բայց կան նաև մարդիկ, ովքեր պաշտպանում են Ռաիսիին»:
Անդրադառնալով հայ- իրանական տնտեսական հարաբերություններին՝ պարոն Ոսկանյանը նկատեց, որ. «Պատժամիջոցներից հետո ունեցել ենք զգալի ձեռքբերումներ ու բացթողումներ: Գլխավոր ձեռքբերումը երրորդ բարձրավոլտ էլեկտրակայանի կառուցումն է: Իսկ կարեւոր բացթողումը կոմունիկացիոն խնդիրն է Հայաստանի եւ Իրանի միջեւ: Խոսքը երկաթուղու կառուցման եւ Հյուսիս-հարավ ավտոմայրուղու մասին է, որոնք ոչ մի կերպ դեռ ի կատար չեն ածվում»:
Արփինե ՍԻՄՈՆՅԱՆ
