Զինծառայողների ապահովագրության հիմնադրամին հունիս ամսին ամենից շատ գումար փոխանցած ընկերություններից է Ավանի աղի կոմբինատը, որը բավականին հաճախ է հիմնադրամին գումար փոխանցել ու նույն ամսվա մեջ մի քանի անգամ տարբեր օրերի: Հիշեցնենք, որ այս կոմբինատը պատկանում է ԼՂՀ նախկին նախագահ Արկադի Ղուկասյանի եղբորը՝ ԱԺ նախկին պատգամավոր Արեգ Ղուկասյանին:
Միայն հունիս ամսվա ընթացքում տարբեր օրերին կոմբինատից հիմնադրամին փոխանցված ընդհանուր գումարը կազմել է մոտ երեք միլիոն դրամ:
Կինոռեժիսոր Ռուբեն Գեւորգյանցի հիշատակին անցած ամիս հիմնադրամին է գումար փոխանցել նաեւ գործարար Հովիկ Մուսայելյանի ընկերությունը՝ «Սինոփսիս Արմենիան»՝ 80.000 դրամ եւ «Երեւանի գարեջուր» ընկերությունը՝ մեկ միլիոն 200.000 դրամ:
ՊՆ փոխնախարար Արտակ Դավթյանը հունիսին հիմնադրամին փոխանցել է տասը հազար դրամ, ի դեպ 1000plus.am կայքում տեղադրված տեղեկատվության համաձայն՝ փոխնախարարը գումար է փոխանցել միայն հունիսին:
Իսկ փետրվարից հիմնադրամին գումար փոխանցած անհատների ու ընկերությունների ցանկում գեներալների, գործարար պատգամավորների անուններ կամ նրանց պատկանող ընկերությունների պաշտոնյաների անուններ չկան:
Արփինե ՍԻՄՈՆՅԱՆ
