Ինչպես տեղեկացրել ենք, ոստիկանությունը հայտնաբերել ու ձերբակալել էր հուլիսի 9-ին Գյումրու «Ամեն ինչ տան համար» շինանյութի խանութի մոտ 35-ամյա Ս․Հ-ին դանակահարելու մեջ կասկածվող անձին՝ 21-ամյա Կ․Հ-ին։ Վերջինս Գյումրու Շչեդրինի փողոցում վիճաբանել, այնուհետ կտրող-ծակող գործիքով վնասվածք է հասցրել Ս․Հ-ի կրծքավանդակին, որին Գյումրու բժշկական կենտրոնից օրերս տեղափոխվել էին Երևան Գրիգոր Լուսավորիչ հիվանդանոց, կրծքային վիրաբուժության մասնագիտացված բաժանմունք՝ իր հետագա բուժումը շարունակելու, քանի որ Գյումրու հիվանդանոցը չունի նման բաժանմունք ու մարզում չկա նաև կրծքային վիրաբույժ։
Մեզ հայտնի դարձավ, որ Շիրակի մարզի ընդհանուր իրավասության դատարանը որպես խափանման միջոց 21-ամյա Կ․Հ-ից ստորագրություն է վերցրել երկրից չհեռանալու մասին։
Հիշեցնենք, որ ըստ Aravot.am-ի տեղեկությունների, Ս․Հ․-ի դանակահարության մեջ կասկածվողը նրա քրոջ հարևանն է։ Վերջինս շրջապատում հայհոյանքներ է հնչեցրել, Ս․ Հ․-ի քույրն էլ խնդրել է եղբորը՝ կարգի հրավիրել նրան։ Ս․ Հ․-ն էլ, իր հետ վերցնելով քրոջ 10 տարեկան տղային՝ գնացել է շինանյութի խանութի մոտ՝ վերջինիս զգաստացնելու, հասկացնելու, որ կանանց ներկայությամբ չեն հայհոյում, վիճաբանություն է սկսվել նրանց միջև, որն ավարտվել է դանակահարությամբ։
Նունե ԱՐԵՎՇԱՏՅԱՆ
