«Մի դարձրեք Ղարաբաղը մանրադրամ եւ վճարման միջոց՝ Ադրբեջանին ԵՏՄ տանելու համար: Սա ասել եմ դեռեւս այն ժամանակ, երբ ՀՀ-ն անդամակցեց ԵՏՄ-ին: Այդ կերպ Ռուսաստանը ՀՀ-ի մասով իր խնդիրը լուծեց: Պետք է լուծի նաեւ Ադրբեջանի մասով: Ինչպե՞ս…Ադրբեջանը փողի կարիք եւ անվտանգության խնդիր չունի, նրան կարելի է գայթակղել միայն մեկ բանով՝ Ղարաբաղը նրան տալով»,-Aravot.am-ի հետ զրույցում խոսելով Ադրբեջանի՝ ԵՏՄ-ին անդամակցելու հեռանկարի մասին, ասաց քաղաքագետ Արա Պապյանը:
Նա միաժամանակ նշեց՝ Ռուսաստանին ձեռնտու չէ Արցախն Ադրբեջանին տալը, քանի որ այդ կերպ կկորցնի ՀՀ-ի եւ Ադրբեջանի հանդեպ ունեցած լծակը, բայց Ռուսաստանը կփորձի հօգուտ Ադրբեջանի որոշ փոփոխություններ անել. «Այսինքն՝ վճարել Ադրբեջանի անդամակցության համար: Շրջանների վերադարձի մասին է խոսվում…Այդուհանդերձ, կարծում եմ, որ խնդիրը կմնա կախված եւ ՀՀ-ին ու Ադրբեջանին կախման մեջ կպահի Ռուսաստանից»:
Ապա Արա Պապյանն անհեթեթություն որակեց ԱԺ փոխխոսնակ Էդուարդ Շարմազանովի՝ վերջերս հեռուստաեթերում ասված կարծիքը, թե Ադրբեջանի՝ ԵՏՄ-ին անդամակցելու դեպքում կնվազեն վերջինիս կողմից արցախա-ադրբեջանական սահմանին ռազմական գործողությունների դիմելու ռիսկերը: «Սումգայիթի, Բաքվի դեպքերը տեղի ունեցան այն ժամանակ, երբ մենք Սովետական միության անդամ էինք, սակայն այդ միությունը չկանխեց հայերի հանդեպ ցեղասպանական գործողությունները»,-որպես օրինակ հիշատակեց Արա Պապյանը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
