«Որեւէ տեղեկություններ չունեմ առ այն, որ դեկտեմբերին նախագահների հանդիպում է լինելու»,-ՀՀ ԱԳՆ-ում այսօր լրագրողների հետ զրույցում անդրադառնալով լուրերին, թե առաջիկայում ՀՀ եւ Ադրբեջանի նախագահների հանդիպում է սպասվում, ասաց ՀՀ արտգործնախարար Էդվարդ Նալբանդյանը:
Նրա խոսքով՝ եթե համապատասխան պատրաստվածություն լինի, կքննարկեն հանդիպման հնարավորությունները, բայց, ամեն դեպքում, Հայաստանը տրամադրված է եւ շարունակելու է իր ջանքերը՝ Արցախյան հակամարտության բացառապես խաղաղ կարգավորման ուղղությամբ:
Էդվարդ Նալբանդյանն ընդգծեց. «Կարգավորման սկզբունքները բանակցային սեղանին են, մենք երկար ենք դրանց շուրջ բանակցություններ վարել…Ադրբեջանն ասում է, որ կարիք չունի բանակցել այդ սկզբունքների շուրջ: Բայց, չնայած այդ ապակառուցողական դիրքորոշմանը՝ պետք է շարունակել բանակցությունները»:
ՀՀ արտգործնախարարը հավելեց, որ բանակցություններին այլընտրանք չկա:
Լուիզա ՍՈՒՔԻԱՍՅԱՆ
