ՀՀ ԱԳՆ-ում այսօր նախարար Էդվարդ Նալբանդյանն իր ռուսաստանցի գործընկեր Սերգեյ Լավրովի մասնակցությամբ ճեպազրույցում արձագանքեց ռուսաստանյան լրատվամիջոցի ներկայացուցչի այն դիտարկմանը, թե՝ «Ադրբեջանը հայտարարում է, որ միտված է հնարավորինս արագ լուծել Արցախյան հակամարտությունը. այդ դեպքում, ո՞րն է խնդիրը»:
Նալբանդյանը նկատեց. «Խնդիրն այն է, որ գործը պետք է համընկնի խոսքերի հետ: Հիշեցնեմ՝ ժամանակին կազանյան հանդիպումից առաջ կողմերի մասնակցությամբ համաձայնեցվեց հակամարտության կարգավորման հիմնական սկզբունքների տեքստը: Հանդիպումից տառացիորեն առաջ ադրբեջանցիները տասը, իսկ իրականում՝ տասներկու փոփոխություններով ժամանեցին Կազան: Դա այն դեպքում, երբ պայմանավորվել էինք, որ տեքստերի մեջ փոփոխություններ չեն լինելու: Նույնը ժամանակին եղավ Սոչիում, Աստրախանում…»:
Էդվարդ Նալբանդյանը նաեւ հիշեցրեց՝ Վիեննայում եւ Սանկտ-Պետերբուրգում եւս համաձայնություններ ձեռք բերվեցին՝ դիտորդների թվի ավելացում, վստահության մեխանիզմների ներդրում, սակայն Ադրբեջանը կրկին նահանջ արեց՝ ասելով, որ ոչ մի բանի շուրջ չի համաձայնել: «Ադրբեջանը բարձր մակարդակով ասաց, որ պատրաստ է ֆինանսավորել շփման գծում դիտորդների թվի ավելացումը, սակայն եւս մեկ նահանջ արեց: Պարզ է՝ մեկ անգամ չէ, որ այդպես է եղել»,-ասաց նա:
Նալբանդյանի խոսքով՝ Ադրբեջանն ամեն սուտ օգտագործելով՝ փորձում է նահանջել համաձայնություններից. «Վերջերս Ժնեւում էլ խոսվեց այն մասին, որ լարվածությունը նվազեցնելու համար պետք է քայլեր կատարվեն, բայց…Այ այսպիսին է իրավիճակը: Հուսանք, որ Ադրբեջանը կփոխի իր դիրքորոշումը եւ ցանկությունը կարտահայտի գործերով»:
Լուիզա ՍՈՒՔԻԱՍՅԱՆ
