Վաֆլիների պատրաստման համար ոչ առանձնակի հմտություն է պետք, ոչ շատ մթերքներ, ոչ ժամանակ: Միայն թե պետք է վաֆլի պատրաստող սարք, որը հիմա կա կենցաղային տեխնիկայի մեծուփոքր խանութներում, անգամ` սուպերմարկետներում, եւ թանկ չէ:
Անհրաժեշտ մթերքները
Կաթ- 1 բաժակ
Ձու- 2 հատ
Կարագ-100 գրամ
Ալյուր-1 բաժակ
Շաքարավազ- ¾ բաժակ
Աղ եւ սոդա- 0,5-ական թեյի գդալ
Վանիլի մզվածք- 1 թեյի գդալ կամ կես տուփ փոշի վանիլին
Պատրաստման եղանակը
Վաֆլի պատրաստող սարքը միացրեք` մի քանի րոպե է պետք, մինչեւ տաքանա: Հենց այդ ընթացքում էլ կհասցնեք պատրաստել խմորը:
Սենյակային ջերմաստիճանի ձուն, շաքարավազը, հալեցրած կարագը եւ կաթը հարեք, ավելացրեք ալյուրը, որի մեջ լցված է աղն ու սոդան, շարունակեք հարել, ավելացրեք վանիլինը:
Կախված վաֆլի պատրաստող սարքի ձեւից եւ չափսից` տարբեր քանակի խմոր պետք է լցնեք մեջը: Ինձ մոտ փոքր չափսի սարք է, եւ ես լցնում եմ 2 գդալ խմոր` յուրաքանչյուր անգամ: Սակայն լինում են ավելի խոշոր, քառակուսի վաֆլիներ պատրաստող սարքեր, դրանց մեջ ավելի շատ խմոր է պետք լցնել` անհրաժեշտ չափերը կարդացեք սարքավորման տեխանձնագրում:
Լցնելուց հետո կափարիչը փակեք, թողեք 2-3 րոպե, ապա բացեք եւ հանեք վաֆլիները, լցրեք հաջորդ չափաքանակի խմորը: Ի դեպ, եթե բացելիս դժվար բացվի, ուրեմն` դեռ պատրաստ չեն, թողեք մեկ-երկու րոպե էլ եփվի:
Կարող եք մատուցել կարամելի թանձրուկով, նուտելայով, տարբեր ջեմերով:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
