Սումգայիթյան դեպքերը համապատասխանում են ցեղասպանության սահմանման բոլոր կետերին: Այս մասին Aravot.am-ի հետ զրույցում ասաց Արցախի խորհրդարանի պատգամավոր Հայկ Խանումյանը` հավելելով, որ փաստերը հստակ ներկայացվում են նաև ադրբեջանցիների վկայություններով:
‹‹Ամեն դեպքում գտնում եմ, որ պետք չէ կենտրոնանալ ցեղասպանություն բառը անընդհատ օգտագործելու և նման որակում տալու վրա, որովհետև դա բարդացնում է մեր խնդիրը: Հստակ դատավարման պրոցեսներ այն տարիներին ԽՍՀՄ-ում չեղան, սակայն ոչինչ չէր խանգարում մեզ` հետո արդեն գործնական քայլերի դիմելու և տարբեր միջոցներով հասնել ոճրագործությունը կատարողների դատապարտմանը` այդ թվում միջազգային հետախուզման միջոցով››,- նշեց Հայկ Խանումյանը:
Ըստ նրա, եթե ժամանակին Հայաստանի առաջին հանրապետությունը իր կարճատև գործունեության արդյունքում պատրաստ չեղավ Հայոց ցեղասպանությունը Թուրքիային և միջազգային հանրությանը ճանաչել տալու, և այսօր միակ մխիթարանքը այսպես ասած տարբեր պետությունների կողմից դատապարտող բանաձևերի ընդունումն է, ապա այժմ` սումգայիթյան ոճրագործությունից հետո` մի քանի տարի անց, ստեղծվել են երկու հայկական պետություններ և նրանց համար խնդիրը պետք է լինի կոնկրետ քայլերով հասնել ոճրագործների պատժմանը:
Ինչ վերաբերում է Ադրբեջանի կողմից հորինված Խոջալուի ցեղասպանությանը, ապա Հայկ Խանումյանի կարծիքով հայկական կողմից զգալի աշխատանք կատարվում է`ցույց տալու Ադրբեջանի զերծարարությունները. ‹‹Այսօր գլխավոր փաստարկը մնում են ադրբեջանցիների` այդ թվում Խոջալուի բնակիչների վկայությունները: Կարծում եմ, որ անհրաժեշտ ձևով օգտագործվում և բավականին հղումներ պարունակող պատասխաններ է տրվում հայկական կողմից` իրական փաստերը ներկայացնելու համար, հակառակ ադրբեջանական հստակ հիմքեր չպարունակող վկայությունների: Բացի այդ, ադրբեջանցի այն լրագրողները, ովքեր նկարագրել են կատարված խոշտանգումները, այժմ սպանված են ու դա ևս հզոր փաստարկ է հայկական կողմի համար, որը կարծում եմ այս կամ այն չափով օգտագործվում է››:
Դավիթ ԱԲԱՂՅԱՆ
