Երեւանի ավագանու ընտրությունների ընթացքում արդեն լրագրողների եւ լրատվամիջոցների հասցեին սպառնալիքների եւ վիրավորանքների, նաեւ բռնության դեպքեր են արձանագրվել, որոնք հավաքում է «Խոսքի ազատության պաշտպանության կոմիտեն:
Մեկնաբանելով ընտրատեղամասերում եւ շտաբներում տեղի ունեցող իրադարձությունները՝ կոմիտեի նախագահ Աշոտ Մելիքյանն Aravot.am-ին ասաց. «Փաստորեն, ընտրական գործընթացում Հայաստանում ոչինչ չի փոխվել, այդ թվում նաեւ լրագրողների նկատմամբ բռնությունների եւ խոչընդոտումների առումով: Խորհրդարանական ընտրությունները դեռ նոր են ավարտվել: Այն ժամանակ նույնպես արձանագրեցինք բռնություններ եւ խոչընդոտումներ: Այս ամենը կրկնվում է նաեւ այսօր: Կարծում եմ, դա անպատժելիության հետեւանքն է, որ տիրում է Հայաստանում: Փաստորեն, ոչ «Էլեկտրիկ Երեւանի» քրեական գործը, ոչ Խորենացի փողոցի եւ Սարի թաղի իրադարձությունները համապատասխան ընթացք չստացան: Նույն բռնությունները տեղի ունեցան նաեւ խորհրդարանական ընտրությունների օրը եւ հանրությունը չի տեսնում իշխանությունների կողմից համարժեք գործողություններ:
Կարծում եմ, լրագրողների եւ լրատվամիջոցների իրավունքները խախտողներն այս ամենը տեսնելով՝ սանձազերծվում են ավելի շատ, ձեռքերին, լեզուներին ազատություն տալով՝ չեն թողնում, որպեսզի լրագրողներն իրենց պրոֆեսիոնալ պարտականությունները լրիվ կատարեն:
Մենք այսօր աշխատում ենք հատուկ ռեժիմով, հավաքում այդ տիպի ահազանգերը եւ երեկոյան ժամը 20:00-ին ասուլիս ենք անելու «Մեդիա կենտրոնում» (Սարյան 30), որտեղ ամեն ինչ կհրապարակենք»:
Աշոտ ՀԱԿՈԲՅԱՆ
