Մոսկվան և Անկարան համաձայնության են եկել ռուսական C-400 համակարգերը Թուրքիային մատակարարելու վերաբերյալ: Այս մասին, ինչպես հաղորդում է «ՌԻԱ Նովոստին», ասվում է Ռուսաստանի ռազմատեխնիկական համագործակցության դաշնային ծառայության մամուլի ծառայության հաղորդագրության մեջ:
«Կողմերը համաձայնության են հասել C-400-ների մատակարարման շուրջ և ստորագրել են պայմանագիրը: Ռուսաստանը պատրաստ է այն իրականացնել»,- ասվում է պաշտոնական հաղորդագրության մեջ:
Գործարքի մանրամասները չեն հաղորդվում «թեմայի յուրահատուկ և զգայուն լինելու» պատճառով:
«Պայմանագիրը մեկնաբանելու առաջնային իրավունքը պատկանում է պատվիրատուին: Ընդ որում, անհրաժեշտ է ընդգծել, որ այդ համակարգերի մատակարարումը Թուրքիա համապատասխանում է Ռուսաստանի Դաշնության աշխարհաքաղաքական շահերին»,- ասել են գերատեսչությունից:
Պատրաստեց Վիկտորյա ԱՆԴՐԵԱՍՅԱՆԸ
