«Յուրաքանչյուր երկրում էլ խնդիրներ կան, հատկապես Իրանում, որը քառասուն տարի անարդար վերաբերմունքի է արժանացել ԱՄՆ-ի եւ նրա կողմնակից երկրների կողմից»,-ԵՊՀ-ում այսօր ուսանողների հետ հանդիպմանն անդրադառնալով Իրանում վերջերս տեղի ունեցած բողոքի ցույցերին, ասաց ՀՀ-ում Իրանի դեսպան Սեյեդ Քազեմ Սաջադին:
Նա նկատեց՝ ԱՄՆ-ի վերաբերմունքն Իրանի հանդեպ պատճառ դարձավ, որպեսզի Իրանն ինքնաբավ դառնա բոլոր բնագավառներում. «Այն երկրները, որոնք ցանկանում են գերտերությունների կարգավիճակով հարաբերություններ ստեղծել, չեն կարող հաջողության հասնել: Քառասուն տարի առաջ՝ մինչեւ իսլամական հեղափոխությունը, ԱՄՆ-ն ներկա է եղել Իրանում, սակայն նրա կողմից կառուցողական քայլեր չենք տեսել: Նրա միակ նպատակն այն էր, որ Իրանի հնարավորությունները դուրս մղվեին»:
Ապա դեսպանը վստահեցրեց. «Մենք միշտ եղել ենք եւ լինելու ենք խաղաղության կողմնակից, մենք բարձր ենք գնահատում մեր հարաբերությունները բոլոր հարեւան երկրների հետ: Այլ պետություններին թույլ չենք տա ոտնձգություններ կատարել մեր հանդեպ եւ խարխլել այդ հարաբերությունները»:
Լուիզա ՍՈՒՔԻԱՍՅԱՆ
