«ՀՀ երկաթուղի» հատուկ նշանակության պետական ձեռնարկության գլխավոր տնօրեն Վլադիմիր Ասրիյանցին մեղադրանք առաջադրվեց այս տարվա հուլիսի 10-ին։ Նա մեղադրվում էր տեղակալ Լեւոն Հակոբյանի հետ 1995 թ. Վահե Յաղուբյանից ստացած առանձնապես խոշոր չափերի՝ 15 հազար դոլար կաշառք ստանալու, վերջինիս օգտին գործողություններ կատարելու համար։ Գումարից 2000 դոլար էլ տրվել էր ՀՀ տրանսպորտի եւ հաղորդակցության նախարարության գիտատեխնիկական զարգացման վարչության պետ Կառլեն Սահակյանին։
Օրեր առաջ բավարարվեց գլխավոր դատախազության քննչական վարչության ՀԿԳ քննիչ Ա. Նադոյանի միջնորդությունը եւ Վլ. Ասրիյանցին կալանքի տակ պահելու ժամկետը երկարացվեց մինչեւ 2000 թ. հունվարի 8-ը, «հաշվի առնելով Վլ. Ասրիյանցին վերագրվող արարքի վտանգավորության բնույթն ու աստիճանը, որ նա ազատության մեջ մնալով կարող է թաքցնել ու խուսափել քրեական պատասխանատվությունից»։ Վերաքննիչ բողոքը, որ ուղարկել էր քրեական եւ զինվորական գործերով վերաքննիչ դատարանի Վլ. Ասրիյանցի պաշտպան Կ. Գրիգորյանը, մերժվել է։ Պաշտպանը նշել էր, որ «դատական նիստին ներկա չի եղել մեղադրյալը» եւ, որ «քննիչի կողմից շարադրված շարժառիթներն ու հիմքերը կապ չունեն առաջադրված մեղադրանքին»։ Նշվում էր նաեւ այն մասին, որ մեղադրողը չի «առերեսվել» այն վկաների հետ, որոնք իր դեմ ցուցմունք են տվել։
Ռ. Մ.
