«ՄԵՆՔ ՕՏԱՐ ՉԵՆՔ» Պարզվում է, Երեւանում մեր սփյուռքահայ բարեկամներին ընդունում են որպես օտար, այլազգի մարդիկ: «Մեզ խաբել են՝ ասելով, թե այստեղ մեզ սպասում են եւ կընդունեն հարազատի պես»: Այս բողոքները հնչեցին «Դեպի Հայք» կազմակերպության շնորհիվ հայրենիք ժամանած երիտասարդների կողմից: Նրանցից շատերն ապշած են մեր կուլտուրայից ու հոգեբանությունից: Մեր զրուցակից աղջիկները հիմնականում բողոքում են մեր երիտասարդների «գռեհիկ» պահվածքից: Եվ պատմում են, որ իրենց հայրենի փողոցներով հանգիստ քայլել չեն կարողանում, քանի որ անընդհատ ենթարկվում են երիտասարդների հետապնդումներին: «Փողոց դուրս գալ խուսափում ենք, քանզի անընդհատ ստիպված ենք լսել անպարկեշտ հարցադրումներ»,- նշեց Վարդիկ Տեֆթերետյանը: Ըստ նրանց, օրերս նույնիսկ քաշքշել են աղջիկներից մեկին: «Նրանք գիտեն, որ մենք սփյուռքահայեր ենք, դրա համար էլ նման ոտնձգություններ են անում»,- ասաց նա: Սփյուռքահայ երիտասարդ տղաներին նույնպես ապշեցրել է մեր երիտասարդների պահվածքը: «Նրանք չգիտեն հարգել կանանց, միայն մտածում են իրենց հաճույքների մասին»,- ասաց երիտասարդներից մեկը եւ հավելեց. «Դա է վկայում նաեւ նրանց կողմից հորինված տղամարդ լինելու կանոնը՝ չես ծխում, չես խմում՝ նշանակում է տղամարդ չես»: Պարզվում է, տաքսու վարորդները նրանցից կրկնակի գումար շորթելու պահը չեն կորցնում: Որոշ խանութներում եւս խնդիրներ են ծագում հայերենի վատ իմացության պատճառով: Ահա սա է Երեւանը՝ հայրենիքը երազած երիտասարդների տեսանկյունից: Նրանցից մեկը նույնիսկ հարկ համարեց հիշեցնել հետեւյալը. «Տուրիզմը մեծ շահույթ է բերում Հայաստանին, իսկ նման վերաբերմունքը ընդամենը պակասեցնում է տուրիստների թիվը»: ՎԱՐԴՈՒՀԻ ՊԱՊՅԱՆ Սփյուռքահայ աղջիկներին խորհուրդ ենք տալիս նախ՝ տեղացիների «ոտնձգությունների» դեպքում դիմել իրավապահ մարմիններին: Նաեւ՝ մի քանի պատահական դեպքերով կարծիքը չփոխել մեր երիտասարդների մասին: