![\"\"](\"https://www.aravot.am/2009/aravot_arm/April/10/p13.jpg\")
Մեծ Բրիտանիայի լրատվամիջոցները, հիշելով ֆուտբոլի աշխարհի գավաթի առաջնության որակավորման փուլի ապրիլի 1-ին «Ուեմբլի» ստադիոնում կայացած Անգլիա-Ուկրաինա հանդիպման (այն ավարտվել է դաշտի տերերի հաղթանակով՝ 2:1) նախապատրաստությունը, մի հետաքրքիր պատմություն են նկարագրում:
Հավաքականի վերջին՝ բաց մարզմանը, ֆուտբոլիստների մարտական ոգին բարձրացնելու նպատակով հրավիրվել էր Բրիտանիայի թագավորական ծովային հետեւակի 30 զինվոր: Վերջիններս էլ, գիտենալով, որ այդ հանդիպումը կայանալու է կատակի միջազգային օրը, որոշել էին՝ ով ինչպես կարող է զվարճացնել մարզիկներին: Եվ դա նրանց ընդհանուր առմամբ հաջողվել է: Սակայն մի ֆուտբոլիստ՝ հանրահռչակ Դեւիդ Բեքհեմը, այդ օրը երբեք չի մոռանա: Երբ Բեքհեմը բարեւելով սեղմել է իրեն բաժին հասած զինվորի ձեռքը, վերջինիս այդ վերջույթը «պոկվել» ու մնացել է անակնկալի եկած ֆուտբոլիստի ձեռքում: Ընդ որում, զինվորականը բարձրաձայն ճչացել է. «Այս ի՜նչ արիր: Ձեռքս պոկեցիր»: Հասկանալի է, Բեքհեմը տեղում գունաթափվել է ու քիչ է մնացել գիտակցությունը կորցնի: Միայն այն ժամանակ, երբ նույն պահին բոլորն սկսել են ծիծաղել, աստղը հասկացել է, որ դա ընդամենը կատակ է: Իսկ քիչ անց իմացել է նաեւ, որ կատակասեր այդ զինվորը ձեռքը կորցրել է Աֆղանստանի պատերազմում:
