«Արեւորդի» բնապահպանական փառատոնը, որ իր տեսակով եզակի է ամբողջ հարավկովկասյան տարածաշրջանում, այս տարի կկայանա հոկտեմբերի 25-29-ը: ՆՓԱԿ, «Նարեկացի» արվեստի միություն մշակութային կենտրոնները, ինչպես նաեւ «Մարիոթ» հյուրանոցը կհյուրընկալեն փառատոնի տարբեր ծրագրեր: Իբրեւ բացման ֆիլմ, ընտրված է հանրահայտ պրոդյուսեր Լյուկ Բեսսոնի եւ ռեժիսոր Յան Արթուս-Բերտրանդի «Տունը» ֆիլմը: Մարդը խաղաղ գոյակցել է բնության հետ, սակայն վերջին 60 տարիներին երկրի բնակչության արագընթաց աճն ու նավթի հայտնաբերումը փոխել են ամեն ինչ:
Փառատոնի շրջանակներում, բացի ֆիլմերի ցուցադրությունից, նախատեսված է անցկացնել կենդանիների դիմակահանդես, սեմինարներ, «Ռոքը՝ հանուն բնության» խորագրով ակցիա:
«Ռոքը՝ հանուն բնության»-ը ահազանգում է մարդկային միջամտությամբ աղավաղված Երկիր մոլորակի մասին եւ կոչ է անում մարդկանց միահամուռ կանգնել իրենց ապագայի համար, պահպանել բնական ժառանգությունը, որ հենց ինքը՝ կյանքն է: «Ռոքը՝ հանուն բնության» ահազանգ- ձեռնարկը կիրականացվի Լոս Անջելեսում հիմնադրված «Armenian Space Station» պրոգրեսիվ գործիքային ռոք խմբի, Էկլեկտիկ ռոք ենթաոճում ստեղծագործող «Road Movie»-ի, Նյու արմ-մետալ ժանրի հիմնադիր «Որդան կարմիր» խմբի կատարումներով:
