ԱՄՆ-ում անզգույշ սպանության մեղադրանքով ձերբակալվել է հայտնի «գուրու» եւ «անձի զարգացման մասնագետ» Ջեյմս Արթուր Ռեյը, ով կատարել է նոր հեթանոսական ծես, որի արդյունքում մահացել է երեք մարդ: Ռեյը ձերբակալվել է իր փաստաբանի գրասենյակում, նրա համար նշանակված գրավը կազմել է 5 միլիոն դոլար: «Գուրու»-ի ձերբակալման պատճառ դարձած նախադեպը տեղի է ունեցել անցյալ տարվա հոկտեմբերին, Արիզոնայում: Ռեյն իրականացրել է մարդու անձնական հնարավորությունների բացահայտման ուղղությամբ «հոգեւոր զինվոր» կոչվող ծրագիրը, որի շրջանակներում Ռեյի հետեւորդները մասնակցել են «հնդկական շոգեբաղնիք» կամ «քրտնաբեր վրան» կոչվող ծեսին: Դրա ընթացքում վրանում եղել է 55-65 մարդ: «Ուսուցչի» խոսքերով՝ շոգեբաղնիքում ծեսը պետք է դառնար սեմինարի ընթացքում իր աշակերտների հաղթահարած վերջին աստիճանը:
Սեմինարին մասնակցելը յուրաքանչյուրի համար արժեցել է 9 հազար դոլար: Ռեյը խոստացել էր, որ սեմինարի մասնակիցները կկարողանան վրանում վայելել «իրենց կյանքի ամենաանմոռանալի պահերը»: Ընդ որում, ականատեսների վկայությամբ՝ երկժամյա ծեսի ընթացքում շատերը վատ են զգացել ուղղակի վրանում, ուշագնաց են եղել, ոմանց մոտ առաջացել է սրտխառնուք: Սակայն Ռեյը բոլոր հետեւորդներին կոչ է արել մնալ վրանում եւ ամոթանք տվել նրանց, ովքեր ընդհատել են մասնակցությունը ծեսին եւ դուրս եկել վրանից: Արդյունքում՝ «շոգեբաղնիքում» ծեսի 2 մասնակից տեղում մահացել է, 19-ը՝ փոխադրվել հիվանդանոց: