Երեկ Էրեբունի եւ Նուբարաշեն համայնքների ընդհանուր իրավասության դատարանում պետք է շարունակվեր Նուբարաշենի թիվ 11 հատուկ դպրոցի ուսուցիչ Լեւոն Ավագյանի դեմ հարուցված քրեական գործի դատաքննությունը: Հիշեցնենք, որ ուսուցիչը մեղադրվում է անչափահաս սանուհիների նկատմամբ անառակաբարո գործողություններ կատարելու մեջ: Դատական նիստի ժամանակ տուժող Հասմիկ Սինանյանի շահերի ներկայացուցիչ, ՀՀ փաստաբանների պալատի անդամ Տիգրան Հայրապետյանը հանդես եկավ միջնորդությամբ: Նա ասաց, որ չնայած ուղարկված հարցմանը, դատարանը տուժածներ Հ. Սինանյանին եւ Դիանա Հայրապետյանին գործի նյութերի պատճենները չի տրամադրել: Նրանց ներկայացուցիչներին հայտարարվել է, որ պատճենները ստանալու համար պետք է 100 հազար դրամ պետական տուրք մուծեն: Լսելով Տ. Հայրապետյանի փաստարկները՝ դատավոր Արթուր Գաբրիելյանը որոշեց բավարարել միջնորդությունը եւ դատական նիստը նշանակել մայիսի 12-ին: