![\"\"](\"https://www.aravot.am/2010/aravot_arm/October/20/p34.jpg\")
Օրերս «Նարեկացի» արվեստի միությունում բացվեց 5 ժամանակակից նկարիչների՝ Նանա Մինասյանի, Տիգրան Ասատրյանի, Արմեն Խոջոյանի, Սեւան Նաղաշյանի եւ հոլանդացի նկարիչ Ռալֆ Հեյնենի ցուցահանդեսը:
Հայկական բնապատկերներ, հայկական եկեղեցիներ, կանանց դիմանկարներ պատկերող աշխատանքներով հանդես եկող նկարիչները համախմբվել էին մեկ ընդհանուր գաղափարի ներքո՝ նկարել գեղեցիկն ու հայկականը:
Տարբեր երկրներում ապրած եւ ստեղծագործած նկարչուհի Սեւան Նաղաշյանը նշեց, որ խմբակային ցուցահանդեսով ներկայանալը փորձի ձեռքբերման մեծ հնարավորություն է. «Տարբեր ոճերում եմ նկարում: Այսօր տարբեր ոճի աշխատանքներ են ցուցադրված: Սա յուրատեսակ մի էքսպերիմենտ է: Հիմնվում եմ ռենեսանսյան ժամանակաշրջանի գիտելիքների վրա: Առանձնապես երեւալու խնդիր չեմ դնում ստեղծագործելիս…»: Ս. Նաղաշյանի փոխանցմամբ, սա իր երկրորդ խմբակային ցուցահանդեսն է Երեւանում: Իսկ ընդհանրապես անհատական ցուցահանդեսներ է ունեցել Կանադայում, ԱՄՆ-ում, Հոլանդիայում եւ Միացյալ Թագավորությունում:
Համեմատելով հայ եւ օտարազգի արվեստասերին, նկարչուհին ասաց. «Եվ Երեւանում, եւ Նյու Յորքում բնակչությունը ճաշակի առումով խայտաբղետ է: Երկու քաղաքում էլ հետաքրքրված են արվեստով ու բավականին զարգացած են՝ արվեստ հասկանալու համար»:
Տիգրան Ասատրյանը, որը ներկայացել էր ցուցահանդեսին իր «կանանցով», հայ եւ օտարազգի արվեստասերի վերաբերմունքի միջեւ տարբերություն չի տեսնում: Ըստ նրա՝ «Ցուցահանդես եկող մարդը, լինի հայ, թե ամերիկացի, գիտի, որ գալիս է արվեստի հետ հաղորդակցվելու, ըստ այդմ՝ նրա տեսակը պետք է տարբեր լինի բոլոր մարդկանցից»:
Հայ նկարիչների կողքին յուրահատուկ հետաքրքրություն առաջացրեց հայկական եկեղեցիների շարքի հեղինակ՝ հոլանդացի Ռալֆ Հեյնենը: Պարզվում է, երիտասարդ նկարիչը տարիներ առաջ այցելելով Եգիպտոս, տեսել է հայկական եկեղեցի ու սիրահարվել հայկական ճարտարապետությանը: «Որոշեցի անպայման հայկական եկեղեցիները իմ աչքով տեսնել եւ ուսումնասիրել: Արդեն շրջել եմ ողջ Հայաստանով, այցելել նաեւ Արեւմտյան Հայաստան: Նկարել եմ Աղթամարի Սուրբ Խաչ եկեղեցին՝ խաչով»:
Ցուցահանդեսը կգործի մինչեւ հոկտեմբերի 28-ը: