168.am: ԱՄՆ-ի մասնակցությունը Հայաստանի և Ադրբեջանի միջև խաղաղության գործընթացին նոր հնարավորություններ է ստեղծում Հարավային Կովկասում․ հայտարարել է Վրաստանի փոխվարչապետ և արտաքին գործերի նախարար Մակա Բոճորիշվիլին ՄԱԿ-ի Գլխավոր ասամբլեայի 81-րդ նստաշրջանի շրջանակում անցկացվող ամենամյա «Կոնկորդիա» գագաթնաժողովում։
«Հարավարևելյան Եվրոպան և Սև ծովը որպես կայունության հենասյուն» խորագրով քննարկման ժամանակ նա նշել է Հարավային Կովկասի աշխարհաքաղաքական աճող նշանակությունը։
Բոճորիշվիլիի խոսքով՝ տարածաշրջանում տեղի ունեցող գործընթացներն ավելի կարևոր են դառնում ոչ միայն տարածաշրջանի, այլև ամբողջ աշխարհի համար՝ ստեղծելով նոր հնարավորություններ Վրաստանի համար։
Նա ընդգծել է ԱՄՆ-ի մասնակցության կարևորությունը Հայաստանի և Ադրբեջանի միջև խաղաղության գործընթացին և նշել Վրաստանի դերը Հարավային Կովկասում խաղաղության և կայունության ապահովման գործում։
Կարդացեք նաև
«Վրաստանը միշտ կարևոր դեր է խաղացել տարածաշրջանում խաղաղության ապահովման և հակամարտությունների խաղաղ կարգավորման գործում»,- հայտարարել է Բոճորիշվիլին։
Նախարարը նաև անդրադարձել է Վրաստանի երկարատև գործընկերությանն ԱՄՆ-ի և ՆԱՏՕ-ի հետ և նշել երկրի ներդրումը միջազգային առաքելություններում։
Բոճորիշվիլին ընդգծել է, որ Վրաստանը շարունակում է ձգտել ինտեգրվել Եվրամիությանը։ Նրա խոսքով՝ երկրի աճող աշխարհաքաղաքական դերը պահանջում է տարբեր գործընկերային հարաբերությունների զարգացում, սակայն դա չի նշանակում հրաժարում ԵՄ անդամակցության ձգտումներից։
Նա նաև նշել է, որ երկրում անվտանգության և կայունության պահպանումը հիմք է ստեղծում տնտեսական զարգացման և միջազգային համագործակցության հետագա ընդլայնման համար։
