Գյուղական համայնքների զարգացման «Թրփանճեան» ծրագրի շահառու, նոյեմբերյանցի անհատ ձեռներեց Անուշ Ծատուրյանը եւ «Թրփանճեան» հիմնադրամի ֆինանսավորող Հայաստանի ամերիկյան համալսարանի մի խումբ ուսանողներ նոյեմբերի 25-ին նվերներով այցի էին գնացել Տավուշի մարզի սահմանամերձ Դովեղ գյուղի նախակրթարան: 690 բնակիչ ունեցող գյուղի նախակրթարանն ունի 25 սան: Հյուրերը նվեր էին բերել գրենական պիտույքներ, նկարչական պարագաներ, փափուկ խաղալիքներ: Անուշ Ծատուրյանը սահմանամերձ գյուղի 3 հղի կանանց նվիրեց իր արտադրած նորածնի սպիտակեղենի փաթեթներ: Հարեւան Բարեկամավան գյուղում հյուրերը հագուստներ նվիրեցին գյուղի անապահով 2 ընտանիքի: Բարեկամավանի միակ հղին էլ Անուշ Ծատուրյանից նորածնի փաթեթ ստացավ: Գյուղական համայնքների զարգացման «Թրփանճեան» ծրագրի Տավուշի մարզային գրասենյակի ղեկավար Զորայր Կիրակոսյանը հայտնեց, որ Դովեղից եւ Բարեկամավանից զատ ծրագրի շահառուներ են նաեւ Բերդի տարածաշրջանի սահմանամերձ Այգեպար, Այգեձոր, Չինարի եւ Չորաթան գյուղերը, որոնք նույնպես նվերներ են ստանալու: