![\"\"](\"https://www.aravot.am/2011/aravot_arm/March/24/p15.jpg\")
Մարտի 22-ին Եվրախորհրդի գլխավոր քարտուղար Թյորբորն Յագլանդը նամակ է հղել Ադրբեջանի նախագահ Իլհամ Ալիեւին, որում իր մտահոգություններն է հայտնել այդ երկրում քաղաքական բանավեճում բազմակարծության, խոսքի եւ հավաքների ազատության սահմանափակումների առնչությամբ: «Ազատություն» ռ/կ-ի մատուցմամբ, Յագլանդը Ալիեւին կոչ է արել փոխել «հավաքների ազատության նկատմամբ խիստ սահմանափակող մոտեցումը»՝ մտահոգություն հայտնելով Բաքվում մարտի 11-ի եւ 12-ի ցույցերին նախորդած ձերբակալությունների մասին հաղորդագրությունների կապակցությամբ:
ԵԽ գլխավոր քարտուղարը նաեւ իր հիասթափությունն է արտահայտել այն փաստի առնչությամբ, որ Ադրբեջանի իշխանությունները շարունակում են չկատարել Մարդու իրավունքների եվրոպական դատարանի վճիռը՝ դիտարկել բոլոր հնարավորությունները խմբագիր Էյնուլա Ֆաթուլաեւի ազատազրկմանը վերջ տալու համար:
Թյորբորն Յագլանդը վերահաստատել է մարդու իրավունքներին եւ հիմնարար ազատություններին վերաբերող օրենսդրությունը եւ վարչական ու դատական պրակտիկան Եվրախորհրդի անդամ երկրից ակնկալվող մակարդակի բարձրացնելու գործում Ադրբեջանի իշխանություններին օժանդակելու իր առաջարկը: Եվրախորհրդի գլխավոր քարտուղարը նաեւ Բաքու այցելելու եւ այդ խնդիրները Ալիեւի ու նրա վարչակազմի հետ քննարկելու պատրաստակամություն է հայտնել:
