Անհավանական է, բայց աշխարհի 8-րդ չեմպիոն Միխայիլ Տալի վեցերորդ հուշամրցաշարում երրորդ անգամ անընդմեջ միայն ոչ-ոքիներ գրանցվեցին: Մոսկվայում, ասես, ամեն ինչ խաղաղ է: Բայց այդպես լինում է միայն մեծ փոթորիկներից առաջ: Մանավանդ, որ մրցաշարի ավարտին արդեն ընդամենը երեք տուր է մնում եւ խաղատախտակների առջեւ շախմատային գերաստղերն են, որոնց մեջ են աշխարհի գործող չեմպիոնը եւ հավակնորդը, աշխարհի թիմային չեմպիոնը, ՖԻԴԵ-ի վարկանիշային ցուցակի առաջատարը եւ աշխարհի գավաթակիրը: Այնպես որ, փոթորիկ անպայման լինելու է: Դա է պարտադրում նաեւ մրցաշարային աղյուսակի խիտ դասավորվածությունը. Չորս առաջատարները` Լեւոն Արոնյանը, Մագնուս Կարլսենը, Յան Նեպոմնյաշչին եւ Սերգեյ Կարյակինը վեց տուրից հետո վաստակել են 3,5-ական միավոր: Եվ եթե Լեւոնի եւ Մագնուսի պարագայում դա բնական է, ապա հաստատ մյուս երկուսին իրենցից բարձր տեսնել չեն ուզենա ընդամենը կես միավոր պակաս ունեցող Անանդը, Իվանչուկը, Սվիդլերը: Էլ չենք խոսում աղյուսակի հատակին հանգրվանած Գելֆանդի մասին:
Այսօր` 7-րդ տուրում Արոնյանը խաղում է Գելֆանդի, Կրամնիկը` Նակամուրայի, Իվանչուկը` Անանդի, Նեպոմնյաշչին` Կարյակինի, Կարլսենը` Սվիդլերի հետ:
Աշոտ ՀԱԿՈԲՅԱՆ
