Ռուսաստանում այսօր Պետական Դումայի ընտրություններն են: Ըստ ստացվող տեղեկությունների` ժամը 13:00-ի դրությամբ ողջ Ռուսաստանի տարածքում ընտրություններին մասնակցել է ընտրելու իրավունք ունեցողների 25,4 տոկոսը: Այս թիվը ՌԻԱ-Նովոստի գործակալությանը տրամադրել է Ռուսաստանի Կենտրոնական ընտրական հանձնաժողովի նախագահի տեղակալ Լեոնիդ Իվլաեւը: Ռուսաստանի հեռավորարեւելյան շրջաններում քվեարկությունն արդեն ավարտվել է: Վերջին ընտրատեղամասերը կփակվեն մոսկովյան ժամանակով ժամը 21:00-ին: Ըստ ԿԸՀ-ի տվյալների` ներկա պահի դրությամբ ընտրությունների մասնակցության ամենամեծ տոկոսն արձանագրել է Չուկոտկան` 73,39 տոկոս: ՌԴ ողջ տարածքում եւ արտասահմանում բացվել է 95 հազար ընտրատեղամաս: Քվեարկելու իրավունք ունեցողների թիվը հասնում է մոտ 108 մլն-ի:
Ընտրություններին մասնակցում են յոթ կուսակցություններ` Եդինայա Ռոսիան, Ժիրինովսկու ԼԴՊՌ-ը, Կոմկուսը, Սպրավեդլիվայա Ռոսիան, Պատրիոտի Ռոսիին, Յաբլոկոն եւ Պրավոե դելոն: Դումա մտնելու համար կուսակցությունները պետք է կարողանան հավաքել ձայների ամենաքիչը 7 տոկոսը:
Ռուսաստանի ներքին գործերի նախարարության տվյալներով` Ռուսաստանի տարածքում ընտրությունների հետ կապված օրինախախտումներ չեն գրանցվել: Նկատվել են միայն մի քանի անօրինական քարոզարշավի դեպքեր:
Հետաքրքիր է, որ Ռուսաստանի ՆԳՆ-ն չի գրանցել մի քանի անկախ կայքերի եւ բլոգների հանկարծակի խափանումները: Այս պահի դրությամբ անհասանելի են Կոմերսանտ, Էխո Մոսկվի կայքերը եւ մի քանի բլոգներ:
