Այսօր «Իրատես դե ֆակտո» ակումբում, «Ազատ դեմոկրատներ» կուսակցության անդամ Ալիկ Արզումանյանից լրագրողները հետաքրքրվեցին, թե իրենց համամասնականի ցուցակն ի՞նչ սկզբունքով է կազմվելու: Պարոն Արզումանյանն ասաց, որ «մարդիկ կան՝ վիճակագրությամբ են անում, մարդիկ կան՝ այբբենական կարգով են անում: Երեւի նախընտրելի է, որ ցուցակը ղեկավարեն մարդիկ, որոնք հանրությանը ծանոթ են: Մենք թիմ ենք, որում բոլորը հավասար իրավունք ունեն, միմյանց մենք փորձում ենք համոզել եւ համոզելու արդյունքում փորձում ենք ընդհանրության գալ: Վստահ եմ, որ մենք չենք վիճելու տեղերի համար»:
Երեկ ՀԱԿ անդամ Գուրգեն Եղիազարյանը ՀԱԿ-ի ցուցակները կազմելու մասին ասում էր, որ իրենք դա անում են ժպիտը դեմքներին, հանգիստ: Aravot.am-ի հարցին՝ այսինքն դուք է՞լ եք ՀԱԿ-ի պես ժպիտը դեմքներիդ ցուցակ կազմելու եւ ընդհանուր եք որոշելու, որ տեղում ով է, ոչ թե մեկը թելադրելու է՝ Ալիկ Արզումանյանը համեմատության համար վիրավորվեց. «Ես միայն իմ նման եմ ժպտում, ինձ չի հետաքրքրում մյուսները ոնց են անում: ՀԱԿ-ը բաղկացած է տասնյակից ավելի կուսակցություններից, այդ լիդերներն ունեն հավակնություններ եւ ակնհայտ է, որ նման պարագայում արդեն խնդիր է առաջանում: Մենք նման խնդիր չունենք, ունենք համախոհների թիմ եւ մեկը մյուսի արժանիքները քաջ գիտակցում են: Եթե անցնենք Րաֆֆի Հովհաննիսյանի հետ համատեղմանը, այստեղ էական բան չեմ տեսնում, թե ով որ տեղում կլինի: Առաջին կամ երկրորդ տեղը չի, որ ինձ Ալեքսանդր Արզումանյան է դարձնելու, Ալեքսանդր Արզումանյանն է այդ տեղին գին տալու»:
Բանախոսը նաեւ անդրադարձավ համամասնական ընտրակարգի մասին առաջիկայում սպասվող ԱԺ լսումներին: Լրագրողների դիտարկմանը, որ Վարդան Բոստանջյանը երեկ փոխել էր իր տոնայնությունը եւ ասում էր, որ համամասնական ընտրակարգը միակ միջոցը չէ՝ ապահովելու ազատ եւ արդար ընտրություններ՝ Ալիկ Արզումանյանն ասաց. «Պարոն Բոստանջյանին պետք է կոնկրետ պահին բռնացնես ու այդ պահին հաստատես, որովհետեւ 5 րոպե հետո կարող է այլ բան ասի: ԲՀԿ-ն միացել էր այդ նախաձեռնությանը: 15-ին լսումներ են նշանակված, եւ այդ լսումներին կիմանանք՝ միացումը եղել է ինչ-որ մեկի նախաձեռնությո՞ւնը, թե՞ կուսակցության ղեկավարի հանձնարարությամբ, դա պարզ կլինի արդեն»:
Հռիփսիմե ՋԵԲԵՋՅԱՆ
