Մարդու իրավունքների պաշտպան Կարեն Անդրեասյանն այսօր լրագրողների հետ զրույցում անդրադառնալով իր երկու նորանշանակ տեղակալների առնչությամբ մամուլում առկա մեկնաբանություններին, ըստ որոնց՝ «Մարդու իրավունքների պաշտպանի մասին» օրենքի 22 հոդվածը, որով սահմանվում էր պաշտպանի տեղակալ ունենալը՝ դեռ 2006-ին է ճանաչվել ուժը կորցրած՝ ասաց, որ նրանց աշխատանքի վերցնելով օրենք չի խախտել: Չնայած ՄԻՊ-ը բացի մեկ գլխավոր խորհրդականից ուներ եւս երկու խորհրդական ու տեղակալներ, Կ. Անդրեասյանը վստահեցրեց, որ երկու տեղակալի պահանջը կար. «Մենք ունենք նաեւ 30 իրավաբան, ու եթե այդ տրամաբանությանը նայենք, կարող ենք ասել, ի՞նչ է անելու թեկուզ մեկ իրավաբանը կամ խորհրդականը: Աշխատակազմում ունենք շատ աշխատակիցներ, որոնք բոլորն անում են մեկ գործ` տարբեր ոլորտներում` մարդու իրավունքների պաշտպանությամբ են զբաղվում: Եվ բոլորն էլ անում են այդ աշխատանքը տարբեր մեթոդաբանությամբ: Մի մասն անում է անհատական դիմումներով, մյուս մասն անում է համակարգային ուսումնասիրություն, օրենսդրության վերլուծություններ, մյուսները ներկայացուցչություն են ապահովում, աշխատանքներ են տանում հասարակական կազմակերպությունների հետ, համագործակցում միջազգային կազմակերպությունների հետ: Կոնկրետ երկու տեղակալներս ինձ հետ կիսում են այն գործի ծավալը, որն օրենքը թույլ է տալիս»:
Պարոն Անդրեասյանին հիշեցրինք, որ իրավապաշտպան Արթուր Սաքունցն ասել էր, թե ՄԻՊ-ը չկողմնորոշված անձնավորություն է ու դեռ լավ չի պատկերացնում իր անելիքները: Պարոն Սաքունցի կարծիքով, թերեւս այդ էր պատճառը, որ ՄԻՊ-ը շատ հաճախ է դիմում տարբեր հասարակական կազմակերպությունների օգնությանը: Պարոն Անդրեասյանը հրաժարվեց մեկնաբանել Սաքունցի կարծիքը, միայն հավելեց. «Մասնավոր կարծիք է, որը կարող է եւ լինել»:
Արփինե ՍԻՄՈՆՅԱՆ
