Դուք կատարյալ տեսք ունե՞ք: Դա հրաշալի է Ձեզ համար, քանի որ բազմաթիվ հետազոտությունների արդյունքում պարզ է դարձել, որ առանձնահատուկ գրավչությամբ մարդիկ միշտ շատ ավելի սպասված են: Բնավ էլ էական չէ՝ դուք գեղեցիկ եք, թե, պարզապես, միշտ խնամված տեսք ունեք, կարևորն այն է, որ լավ արտաքին տեսք ունեցող մարդիկ կյանքում ամեն ինչի շատ ավելի հեշտությամբ են հասնում, և կյանքը նրանց համար անհամեմատ դյուրին է դառնում: Թեև սա ազնիվ ու արդար չէ, այնուամենայնիվ, փաստն այն է, որ դա անընդհատ հաստատվում է հետազոտությունների արդյունքներով:
Գեղեցիկ մարդիկ, որպես կանոն, ավելի կիրթ, մարդամոտ, ստեղծարար և ջանասեր են՝ ի համեմատություն ոչ այնքան գրավիչ մարդկանց, ովքեր հայտնի են որպես ծույլ, ձանձրալի և երևակայությունից զուրկ: Երբեմն անգամ դատարաններում լավ տեսք ունեցող մարդկանց նկատմամբ ավելի մեղմ պատժամիջոցներ են կիրառվում: Գրավիչ կանայք հաճախ ամուսնանում են հարուստ և զարգացած մարդկանց հետ:
Հետազոտությունների արդյունքները ցույց են տվել նաև, որ գեղեցիկ մարդիկ մոտավորապես 5% ավելի աշխատավարձ են ստանում, քան իրենց գործընկերները:
Իսկ ովքե՞ր են համարվում գեղեցիկ, ովքե՞ր են որոշում գեղեցիկի չափանիշները: Կամ, արդյոք, կա՞ սահմանված չափանիշ, որին պետք է անպայման բավարարել գեղեցիկ համարվելու համար: Սրանք հարցեր են, որոնք ստույգ պատասխան երբևէ չեն կարող ունենալ: Մեզանից յուրաքանչյուրն ունի գեղեցիկի իր պատկերացումը, և միշտ չէ, որ այդ պատկերացումները համընկնում են:
Հոգեբանության 4-րդ կուրսի ուսանողուհի Լիլիթ Հարոյանի համար գեղեցկությունը այցեքարտ է: Լիլիթը շատ է կարևորում արտաքին գեղեցկությունը, որի մեջ նրա համար առաջնայինն աչքերն են, և, բացի դա, ըստ Լիլիթի, աչքերը հոգու հայելին են:
2008 թ.-ի աշխարհի լավագույն մոդել, հայազգի Դավիթ Ղարիբյանը գեղեցկությունը սահմանեց ընդամենը մեկ նախադասությամբ. «Գեղեցկությունը, պարզապես, հոգու արտացոլանքն է»:
Այլ է Թերլեմեզյանի ուսանողուհի 19-ամյա Գոհար Աբրահամյանի գեղեցիկի մեկնաբանությունը: Ըստ Գոհարի՝ գեղեցկությունը խնամվածությունն է, աղջիկների գեղեցկության մեջ կարևորում է կանացիությունը և ճիշտ մտածելու ունակությունը: «Ինձ համար յուրաքանչյուր մարդու մեջ գեղեցկությունն ընդգծող 2 հիմնական հատկանիշներ կան. անկեղծությունը և հմայքը»,- ժպիտով հավելեց Գոհարը:
Ասում են՝ այն ամենը, ինչը մարդը սիրով է անում, անվիճելիորեն գեղեցիկ է: Գեղեցկությունը նշանակում է նաև ինքնավստահություն: Եղե՛ք ինքնավստահ և ամեն ինչ սիրով ու ժպիտով արեք: Կյանքը հիասքանչ է: Ապրե՛ք գեղեցիկ:
Գոհար Խալաթյան
«Առավոտ երիտասարդականի» «ՈւԽ» բաժինը ոչ մի կապ չունի համալսարանական ուսանողական խորհուրդների հետ, «Ուսանողի խոսք» բաժինն է, որտեղ մեր լսարանը հնարավորություն ունի արտահայտվելու իրեն մտահոգով հարցերի շուրջ: Այստեղ կարող եք սիրել, դժգոհել, չարանալ, բարիանալ, կարեկցել, օգնել, շնորհակալ լինել եւ այլն…
Սպասում ենք Ձեր խոսքին` «Առավոտ երիտասարդական» ([email protected])
