Երեկ Կենտրոնական ընտրական հանձնաժողովը հաստատել է 5 քառակուսի մետրը գերազանցող արտաքին գովազդային վահանակներ, քարոզչական պաստառներ փակցնելու իրավունքը` համամասնական ընտրակարգով ընտրություններին մասնակցողների միջեւ: Ըստ այդմ, Հանրապետական կուսակցությունը վահանակների համար կունենա 100 տեղ, «Ժառանգությունը»՝ 50, ՕԵԿ-ը՝ 64, ԲՀԿ-ն՝ 164, ՀՅԴ-ն՝ 38:
«Ժառանգություն» կուսակցության ներկայացուցիչ, պատգամավոր Անահիտ Բախշյանը երեկ Aravot.am-ի հետ զրույցում կասկածի տակ էր առել «Բարգավաճ Հայաստան» կուսակցության նախընտրական ծախսերի համապատասխանելիությունը՝ թույլատրելի չափերին: Այդ առիթով Aravot.am-ի հետ զրույցում ԲՀԿ մամուլի խոսնակ Խաչիկ Գալստյանն ասաց, որ «Բարգավաճ Հայաստան» կուսակցությունը քարոզչական նյութերի եւ պաստառների վրա ծախսելու է այնքան, ինչքան որ թույլատրված է օրենքով. «Եվ ոչ մի լումա ավելի»:
Տիկին Բախշյանի մտահոգություններին, որ մյուս կուսակցությունների համար անհավասար ընտրապայքար են ստեղծում, ԲՀԿ խոսնակը հակադարձեց. «Թող շատ չմտահոգվեն եւ փաստերով խոսեն»: Aravot.am-ի դիտարկմանն էլ` ինչպե՞ս է ստացվում, որ թույլատրելի դրամաշրջանառության սահմաններում, այնուհանդերձ, իշխող կուսակցությունների գովազդն ավելի շատ է ստացվում, ԲՀԿ մամուլի խոսնակը հակադարձեց. «Մենք քարոզչությանը շատ լուրջ ենք վերաբերվում: Իսկ քարոզչության շատ լինելը նաեւ լրատվամիջոցների հետաքրքրություն արդյունք է` մեր քաղաքական ուժի նկատմամբ»:
Ի դեպ, նախորդ ընտրությունների փորձը ցույց տվեց, որ ՀՀԿ-ն եւ ԲՀԿ-ն խախտել էին Հայաստանի օրենսդրությամբ նախընտրական քարոզարշավի ծախսերի համար սահմանված նվազագույն` 60 մլն դրամի շեմը: «Տարածաշրջանային զարգացման կենտրոն- Թրանսպերենսի ինթերնեյշնլ – Հայաստան» հասարակական կազմակերպությունը 2007 թվականի խորհրդարանական ընտրություններին ընդառաջ իրականացրել էր կուսակցությունների նախընտրական քարոզչության և վարչական ռեսուրսների չարաշահման մոնիտորինգ: Ըստ այդ հետազոտությունների, միայն Երևանում, Գյումրիում և Վանաձորում իրականացված քարոզարշավի վրա ՀՀԿ-ն ծախսել էր 79,1 մլն դրամ, ԲՀԿ-ն` 129,6 մլն, ՀՅԴ-ն` 50,7 մլն, ՕԵԿ-ը` 33,1 մլն, իսկ «Ժառանգությունը»` 24 մլն դրամ:
Կարդացեք նաև
Նելլի ԳՐԻԳՈՐՅԱՆ
