ՀՀ վարչապետ Տիգրան Սարգսյանը
Մեդիամաքս: ՀՀ վարչապետ Տիգրան Սարգսյանն ասել է, որ մեր երկրի բանկային հատվածն ԱՊՀ այլ երկրների համեմատ ավելի լավ էր պատրաս ճգնաժամին:
Ինչպես հաղորդում է Մեդիամաքս-ը, վարչապետն այս մասին ասել է ՌԲԿ-ի հարցազրույցի ժամանակ:
«Դա տեղի ունեցավ այն բանի շնորհիվ, որ մենք բանկային հատվածի բարեփոխումներն ավարտել էինք ավելի վաղ, քան այլ երկրներում, եւ մեր բանկային հատվածում “տաք փողեր” չկային: Վերահսկողությունը շատ ուժեղ էր, եւ բանկերի հրապարակային հաշվետվությունները համապատասխանում էին իրականությանը, չկային վատ ակտիվներ, իսկ իրացվելիությունը պահվում էր բարձր մակարդակի վրա: Ի տարբերություն Ղազախստանի, Ռուսաստանի, Ուկրաինայի, որտեղ ներգրավված էին միջազգային ֆինանսական շուկաների “տաք փոխերը”, միջազգային ֆինանսական ճգնաժամի առաջին ալիքը մեզ շրջանցեց», – ասել է Տիգրան Սարգսյանը:
Կարդացեք նաև
Նա նշել է, որ ճգնաժամը իրական հատվածի միջոցով հարվածեց Հայաստանին իր երկրորդ ալիքով:
«Նախեւառաջ, դա կապված էր Ռուսաստանում տիրող իրավիճակի հետ: Առաջին հերթին, մեր իրական հատվածում շատ բարձր է ռուսական ընկերությունների մասնաբաժինը: Երկրորդ խնդիրն այն է, որ Հայաստանում հիմնական ներդրումներն արվում են Ռուսաստանից: Երրորդ գործոնը մասնավոր փոխանցումներն են: Հայաստանի շատ քաղաքացիներ աշխատում են Ռուսաստանում, եւ տարեկան մոտ $ 1 մլրդ-ի մասնավոր փոխանցումները Հայաստանի համար էական նշանակություն ունեն», – ասել է վարչապետը:
«Այս ճգնաժամից մեր քաղած հիմնական դասն այն է, որ անհրաժեշտ է ավելի շատ ուշադրություն դարձնել արտադրական քաղաքականությանը, դիվերսիֆիկացնել ազգային համախառն ներքին արդյունքի կառուցվածքը, իրական հատվածում բարեփոխումները կատարել ավելի արագ տեմպերով»,-ասել է Տիգրան Սարգսյանը:
