Հատվածներ ԱԺ ՀՀԿ խմբակցության անդամ Արտակ Զաքարյանի հետ հարցազրույցից:
– Ինչպե՞ս եք վերաբերվում այն հանգամանքին, որ ե՛ւ ընդդիմությունը, ե՛ւ կոալիցիոն ուժերը քննադատության թիրախ դարձնում են ՀՀԿ-ին։
– Քննադատությունը մեզ համար նորություն չէ, համարյա 15 տարի լինելով իշխանության մեջ եւ մշտապես ունենալով ընդդիմախոսներ, քննադատությունից զերծ չէինք մնալու։ Առողջ քննադատությունն ամրացրեց մեր դիրքերը՝ նպաստելով արդյունավետ կառավարմանը։ Ինչ վերաբերում է կոալիցիոն գործընկերների քննադատությանը, գերազանցապես քննադատում են ոչ թե կոալիցիոն գործընկերները, այլ նրանց շարքերում հայտնված որոշ նորելուկներ, որոնք ինքնահաստատման այդ ճանապարհն են ընտրել։ Ժամանակը ցույց կտա, թե որքան արժե այդ քննադատությունը։
– Ինչպե՞ս է, որ Հայաստանի բնակչության թիվը պակասում է, իսկ ընտրողների թիվը՝ ավելանում։
Կարդացեք նաև
– Հաշվի առեք, որ եթե մարդը երեք-չորս ամսով բացակայում է երկրից, չի կորցնում ընտրելու իրավունքը։
– Այո, բայց վստա՞հ եք, որ արտագնա աշխատանքի մեկնած մարդը քաղաքական բարձր գիտակցությամբ ընտրությունների օրը ծախսելու է ապրուստի համար կուտակած գումարը եւ գալու է քվեարկության։
– Իսկ ո՞վ իրավունք ունի պնդելու, որ այդ մարդն ընտրության չի գալու, եւ ընտրացուցակից հանի նրա անունը։
– Չե՞ք կարծում, որ ընտրակեղծիքների համար բաց տարածք է մնում։
– Ո՛չ, օրենքը յուրաքանչյուր քաղաքացու ընտրելու հնարավորություն է տալիս, եւ քանի դեռ նա Հայաստանի Հանրապետության քաղաքացի է, օրենքով սահմանված կարգով չեն կասեցվել քաղաքացու իրավունքները, նա պահպանում է ընտրելու իրավունքը։
– Այսինքն՝ ստացվում է իրավական վակուո՞ւմ։
– Ինչո՞ւ վակուում, դա օրենքի եւ իրական պատկերի համադրումն է եւ, ի վերջո, դա այն հարցը չէ, որ մեծ տարբերությունների խնդիր դառնա։ Ամեն երկիր էլ ունի բնակչության շարժունակության որոշակի խնդիրներ եւ քաղաքացիներ, որ ժամանակավոր գտնվում են պետությունրց դուրս, չի նշանակում, որ նրանց կանխակալ պետք է զրկել քաղաքացիական իրավունքներից:
Անահիտ ԱԴԱՄՅԱՆ
«Իրատես de facto»
