Այսօր Aravot.am-ի հետ զրույցում ՀԱԿ պատգամավոր Լյուդմիլա Սարգսյանը նոր նախարարների նշանակման մասին խոսելիս, մեր հարցին, թե ի՞նչ կլիներ, եթե ԲՀԿ-ական նախարարները մնային, որովհետեւ քննարկվում էր նաեւ այդ տարբերակը՝ պատասխանեց. «Եթե նրանց նախարարները մնային, ԲՀԿ-ի կեցվածքը շատ կլղոզվեր: Մենք հույս ունենք, որ ԲՀԿ-ն կհայտարարի, որ նա ընդդիմություն է, իսկ նախարարներին թողնելու պարագայում նա կզրկվեր այդ հնարավորությունից, եւ կդիտարկվեր՝ որպես իշխանություն, որպես կոալիցիայի թեկուզ պայմանական անդամ: Այս դեպքում ԲՀԿ-ն հնարավորություն ունի հայտարարել, որ ինքը ընդդիմություն է, եւ ընդիիմության հետ համատեղ պատրաստ է բարեփոխումներ իրականացնել երկրում: Կապրենք՝ կտեսնենք»:
ՀԱԿ պատգամավորը համոզված է, որ նոր նախարարների նշանակումը նախագահ Սերժ Սարգսյանի վերընտրվելու համար է. «Ընդամենը մի քանի նոր նախարար նշանակվեց: Բնական է, որ եթե նպատակը նախագահական ընտրություներին Սերժ Սարգսյանին օգնելն է, հետեւաբար Սերժ Սարգսյանի հին թիմը շատ ավելի վստահելի է եւ բնական է, որ այդ հարցում նա չէր ցանկանում պահպանել կառավարության նախկին կազմը: Նա նոր նշանակումներ արեց՝ հույս ունենալով, որ կստանա նրանց աջակցությունը»:
Հռիփսիմե ՋԵԲԵՋՅԱՆ
