«Ես տարիներ շարունակ ասում եմ` գյուղերում ուժեղ բեւեռացումներ են գնում, եկած միջոցներն ավելի շատ ծառայել են որոշ օլիգարխների հարստացմանը եւ այսօր նրանք դարձել են ֆեոդալներ, իսկ հանրապետության գյուղացիների հիմնական մասն աղքատ է եւ գյուղատնտեսության ոլորտում գյուղացին ոչ մի առաջընթաց չի տեսնում ու ստիպված` տնով-տեղով արտագաղթում է»,-Aravot.am-ի հետ զրույցում ասաց «Ֆերմերային շարժում» գյուղացիական հասարակական կազմակերպության նախագահ Սարգիս Սեդրակյանը:
Այսօր «Անի Պլազա» հյուրանոցում կազմակերպված «Սոցիալական բարեփոխումները Հայաստանում» թեմայով գիտաժողովի ժամանակ, որը «Հրայր Մարուխյան» հիմնադրամի նախաձեռնությամբ էր, ներկայացվեց գյուղատնտեսության, հանքարդյունաբերության, մանկավարժական ոլորտների ռազմավարությունը:
Գյուղատնտեսության նախկին փոխնախարար Սամվել Ավետիսյանի խոսքերով, այսօր մեր երկրում տարվող գնային քաղաքականությունը գյուղոլորտում՝ «աբսուրդ» է, քանի որ, ըստ նախկին պաշտոնյայի` գինը ոչ թե շուկան է թելադրում, այլ` հանրապետության նախագահը, որը վերջերս մթերող ընկերությունների ղեկավարների հետ հանդիպման ժամանակ հրահանգեց խաղողը, ասենք` 130 դրամից էժան չմթերել: Ըստ նրա՝ «կոոպերատիվները գյուղատնտեսության զարգացման մայրուղին են», եւ պարոն Ավետիսյանը գտնում է, որ կոոպերատիվները պետք է ձեւավորել ոչ թե աղքատ գյուղացիներից, այլ` արդեն կանգուն բիզնես ունեցող ֆերմերներից:
Նախկին պաշտոնյայի ելույթը լսելուց հետո Սարգիս Սեդրակյանը Aravot.am-ի հետ զրույցում ասաց. «Ինձ համար զարմանալի է, որ Սամվել Ավետիսյանը փոխնախարար ժամանակ երբեք չի անդրադարձել գյուղատնտեսության ոլորտում տարվող սխալ քաղաքականությանը եւ այսօր հանկարծ հիշել է»: Պարոն Սեդրակյանի զրույցի մանրամասները` տեսանյութում.
Կարդացեք նաև
Համաժողովի մասնակիցներն, անդրադառնալով հանքարդյունաբերությանը, կարծիք հայտնեցին, որ նախ՝ պետք է միջազգային չափանիշները տեղայնացնել եւ հանքարդյունաբերության հիմնական գերակայություն դարձնել պաշարների արդյունավետ ու խնայողաբար օգտագործումը:
Միջոցառմանը ներկա ոչ մետաղական հանքշահագործողներից մեկը դժգոհեց, որ մշակված ռազմավարության մեջ ներառված չէ ոչ մետաղական հանքավայրերի մասին. «Մենք ունենք պերլիտի հանք, որը չենք օգտագործում: 1,8 միլիոն դոլարով վաճառել ենք ամերիկացիներին: Իսկ նրանք փակել են, չեն օգտագործում, որ միջազգային շուկա չգնա»: Ի պատասխան՝ տնտեսագետ Աշոտ Եղիազարյանն ասաց, որ ոչ մետաղական հանքերի ռեսուրսների մասին անդրադարձել են, պարզապես` հակիրճ բովանդակությամբ:
Լուսինե ԲՈՒԴԱՂՅԱՆ
