Նոյեմբերի 6-ին ՀՀ գլխավոր դատախազին է դիմել քաղաքացի Ներսես Պողոսյանը:
Նա բողոքում է ՀՀ ոստիկանության ՔԳՎ Երեւան քաղաքի քննչական վարչության Արաբկիրի քննչական բաժնի ավագ քննիչ Ա. Արամյանի կողմից կայացրած մի որոշման դեմ: Ըստ այդ որոշման, կարճվել է քրեական գործի վարույթը:
Ներսես Պողոսյանը հաղորդում էր տվել ոստիկանություն, ինչն էլ առիթ էր դարձել քրեական գործ հարուցելու:
Ն.Պողոսյանը ներկայացրել էր իր եւ Լուսինե Այվազյանի (ԵՊՀ իրավաբանականի դասախոս Նորիկ Այվազյանի դստեր) միջեւ կնքված փոխառության եւ գրավադրման պայմանագրերը: Պողոսյանը գրավ էր դրել Կոտայքի մարզի Պտղնի գյուղի իր տունը, հողամասը՝ դրա դիմաց Լ. Այվազյանից ստանալով 25. 410. 000 ՀՀ դրամ:
Կարդացեք նաև
Ըստ Ն.Պողոսյանի, ինքը նաեւ վճարել էր Լուսինեին, նրա ամուսնուն՝ Արմենակ Դալիբալթյանին, Կենտրոնական բանկի կրկնապատիկը գերազանցող տոկոսներ՝ ամսական 4000 դոլար, շուրջ 1, 5 տարի, իր իսկ պնդմամբ՝ վճարել էր նաեւ 90 000 դոլար մայր գումարը:
Ըստ քրեական գործ հարուցելու մասին որոշման. «Շարունակելով որպես արհեստ ընտրած իր հանցավոր գործունեությունը, 2009թ. դեկտեմբերի 26-ին առաջին երեք ամիսն ամսական 3,5, այնուհետեւ 5 տոկոս վճարելու պայմանով, Ն.Պողոսյանին պարտքով գումար տրամադրելու դիմաց, Ա.Դալիբալթյանը պահանջել եւ նոտարական կարգով վավերացված հիփոթեքային պայմանագրով կնոջ՝ Լուսինեի անունով որպես գրավ է ձեւակերպել Ներսեսի եղբոր՝ Հակոբ Պողոսյանի, նրա կնոջ՝ Նունե Առաքելյանի, որդիների՝ Ցոլակ եւ Դավիթ Պողոսյանների համատեղ սեփականության իրավունքով պատկանող բնակարանը»:
Ն.Պողոսյանի ներկայացուցիչ՝ ՀՀ փաստաբանների պալատի անդամ Մկրտիչ Դավթյանի տեղեկատվության համաձայն, Ա.Դալիբալթյանը Բագրատաշենի սահմանային կետում բերման է ենթարկվել եւ կասկածվել էր վաշխառության մեղադրանքով:
Սակայն հետագայում նրա նկատմամբ ընտրվել է քաղաքից չբացակայելու մասին ստորագրությունը:
Ներսես Պողոսյանը ՀՀ գլխավոր դատախազին դիմելով՝ հայտնում է, որ որպեսզի կարողանա փակել Լուսինե Այվազյանի կողմից իրեն տված գումարներն ու տոկոսները, վաճառել է Պտղնիի տունը, հողամասը, նույն գյուղում գտնվող եւս երկու հողամասերը՝ 800քմ, Երեւանում գտնվող բնակարանը: Նա ներկայումս բնակվում է վարձով:
Ուշադրության արժանի է այն, որ մինչ գործը կարճվելը, Ն.Պողոսյանը տուժող էր ճանաչվել:
Ն.Պողոսյանի ներկայացուցչի գնահատմամբ, նախաքննության մարմնի տրամադրության տակ գտնվող փաստաթղթերով հիմնավորվել էր, որ Լուսինեն եւ նրա ամուսինը տարբեր ժամանակահատվածներում տոկոսով գումարներ են վերցրել, ինչի արդյունքում տոկոսառուն ընկել է ծայրահեղ վիճակի մեջ, վաճառելով ինչքը:
«Արդյոք, այս քրեական գործի կարճումը հովանավորչություն չէ՞, արդյոք սրանով պաշտպանելով վաշխառուի անօրինական գործողությունները, դրանով պայմաններ չի՞ ստեղծվում, որ վաշխառուն խուսափի հարկային պարտավորություններից, չի՞ խրախուսվում վաշխառուի գործողությունները, չի՞ վնասվում հանրային շահը»,- հարցնում է Ն.Պողոսյանի ներկայացուցիչը:
Ըստ փաստաբան Մկրտիչ Դավթյանի, տվյալ քրեական գործով քննիչը պատշաճ իրավական գնահատական չի տվել ձեռք բերված ապացույցներին:
Ն.Պողոսյանը բողոքարկել է քննիչի կայացրած կարճման որոշումը:
ՌՈՒԶԱՆ ՄԻՆԱՍՅԱՆ
Հ. Գ. Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի վարույթում է գտնվում Ա.Դալիբալթյանի քաղաքացիական հայցը՝ Ն.Պողոսյանից եւ նրա եղբորից գումար պահանջելու մասին:
«Առավոտ» օրաթերթ
