Կապանի տարածաշրջանի Սյունիք գյուղի դպրոցի շենքը 1967թ.-ին կառուցվելուց ի վեր երբեւէ չի հիմնանորոգվել: Այս տարիների ընթացքում որոշ մասնակի նորոգման աշխատանքներ են տարվել միայն` տանիքն է փոխվել, համայնքային բյուջեի հաշվին մեկ դասարան է նորգվել ու գույքով ապահովվել, սակայն դպրոցի շենքը, ընդհանուր առմամբ, խիստ անմխիթար վիճակում է գտնվում: «Աղջիկս գյուղի դպրոցում է սովորում, աննկարագրելի է դպրոցի վիճակը: Աստիճանները, պարկետը քանդված, հատակը բետոնապատ, նույնիսկ այս տարի սեպտեմբերի մեկին մի թեթեւ սվաղել էին աստիճանները, բայց էլի ահավոր էր վիճակը` փոշի, կեղտ, օրեր են լինում երեխաս տուն է գալիս ամբողջովին փոշու մեջ կորած, ստիպված է լինում ոտքից գլուխ հագուստը փոխել: Մոտ երկու տարի է զուգարանների վիճակը նորմալացրել են արդեն, մինչեւ այդ երեխաներն ամեն անգամ վազելով տուն էին գալիս», – ասաց Սյունիք գյուղի բնակիչ Լիդա Թամրազյանը:
Սյունիք համայնքի ղեկավար Սամվել Սարգսյանի խոսքով` դպրոցի հիմնանորգման համար մեծ գումարներ են հարկավոր, ինչը հնարավոր չէ տեղական բյուջեով անել: Մոտավոր հաշվարկներով` 250-300 մլն դրամ գումար է պահանջվում, որը համայնքի բյուջեն չունի եւ պետական աջակցության շնորհիվ միայն հնարավոր կլինի լուծել համայնքի համար մեծ կարեւորություն ունեցող այս հարցը: «Դպրոց մտնում ես, ոնց որ գոմ լինես ոտք դնում, խայտառակ վիճակում է գտնվում: Երեխաները բետոնի վրա են քայլում, ձմռանը նորմալ չի ջեռուցվում, գազաֆիկացված է, բայց ոչ նորմալ վիճակում գտնվող լուսամուտների պատճառով հնարավոր չի լինում նորմալ ջեռուցում ապահովել: Խնդիր ենք դրել մեր առջեւ դիմել նախագահին, որպեսզի պետական միջոցների հաշվին դպրոցը նորոգենք: 2013թ.-ին նախատեսել ենք տեղական բյուջով գոնե ուսուցչանոցը նորոգենք եւ գույքով ապահովենք», -նշեց Սամվել Սարգսյանը եւ տեղեկացրեց, որ դպրոցի անմխիթար վիճակի, ինչպես նաեւ ուսման ցածր մակարդակի, խստության եւ պահանջկոտության բացակայության պատճառով` գյուղի դպրոցահասակ մոտ 150 երեխայից ընդամենը 70-ն է հաճախում գյուղական դպրոց, մյուսները Կապանի դպրոցներ են հաճախում, որտեղ ցուցաբերած բարձր առաջադիմության շնորհիվ էլ հետագայում ընդունվում են հանրապետության տարբեր բուհեր: Համայնքի ղեկավարը դպրոցի հիմնանորոգման հարցը օրերս բարձրացրեց նաեւ Սյունիքի մարզպետարանում կայացած մարզխորհրդի նիստի ժամանակ:
Մերի ՍՈՂՈՄՈՆՅԱՆ
Կարդացեք նաև
