Վերջերս Համազգային թատրոնում կայացավ Պերճ Պռոշյանի «Հացի խնդիր» վեպի հիման վրա ստեղծված համանուն ներկայացման պրեմիերան: Ներկայացման գեղարվեստական ղեկավարը Սոս Սարգսյանն է, բեմականացման հեղինակը՝ Ռուբեն Հովսեփյանը, կոմպոզիտորը՝ Մարտին Վարդազարյանը, բեմադրող նկարիչը՝ Դավիթ Մինասյանը:
19-րդ դարի առաջին կեսի գյուղական իրականության պատկերը վեր հանվեց փայլուն դերակատարների շնորհիվ: Խեչանենց Խեչանը մարմնավորված էր Մխիթար Ավետիսյանի ինքնատիպ խաղով, Մարիամին մարմնավորել էր սիրված դերասանուհի Կարինե Ջանջուղազյանը, Հեղնարին եւ Հերիքնազին՝ Տաթեւ եւ Անի Ղազարյանները, Սմբատի դերակատարը Վարշամ Գեւորգյանն էր: Գագիկ Մադոյանն էլ Միկիտան Սաքոն էր: Պռոշյանական այս երկը հետաքրքրաշարժ սյուժե ունի, լավ գծագրված կերպարներ: Սաքո-Խեչան-մովրով փոխհարաբերությունների ամբողջ ընթացքն էլ կառուցված է փոխադարձ ինքնաբնութագրումների մեթոդով: Խորամանկությունը, փողի պաշտամունքը, ընչամոլ ու անբարո վարքը Սաքոյին դարձնում են մեկն այն նորելուկ հերոսներից, որոնք կյանքի են կոչվել գյուղական նորօրյա հարաբերությունների զարգացման թելադրանքով: Գյուղական կյանքը պատկերվում են բազմաճյուղ եւ տարբերաբնույթ կապերի մեջ՝ այդ ամենին միացնելով ժողովրդական սովորույթի, վարք ու բարքի ընդարձակ ու գունագեղ նկարագրությունները:
Հացի արդիական խնդիր, որն ամփոփոխ է մնացել այսքան ժամանակ: Հարուստ եւ խարդախ, երեկվա անչափահաս, շողոքորթ մովրովներին ու միկիտաններին են հաջորդել այսօրվա չափահաս եւ չափազանց ակտիվ օլիգարխները, իսկ մյուսներն ապրում են կոպեկներով:
Կարդացեք նաև
ՍՈՆԱ ՊՈՂՈՍՅԱՆ
«Առավոտ» օրաթերթ