2013թ. փետրվարի 18-ին կայացան ՀՀ նախագահի ընտրություններ: Հաջորդ օրը ԿԸՀ-ն հրապարակեց արդյունքները, որոնք չեն արտահայտում ընտրողների կամքը: Համաձայն ԿԸՀ-ի, Րաֆֆի Հովհաննիսյանը ստացել է ձայների շուրջ 37 տոկոսը, Սերժ Սարգսյանի 58 տոկոսի դիմաց:
Անգամ այդ պաշտոնական տվյալներով՝ Սերժ Սարգսյանը ոչ միայն չի հասել առավելության, այլեւ քաղաքային տեղամասերի մեծամասնությունում պարտվել է: Հիմնականում գյուղական առանձին տեղամասերում, իբր, ընտրողների 90%-ից ավելի մասնակցությունը եւ հօգուտ Սարգսյանի տրված 90%-ից ավելի ձայներն են ապահովել արդյունքները, որոնց մասին հայտարարել է ԿԸՀ-ն:
Սերժ Սարգսյանն ինչպե՞ս է իրեն հաղթանակ վերագրում, երբ, դիցուք, Աբովյանի 25 տեղամասերից 21-ում պարտություն է կրել եւ միայն մեկում «ստանալով» 1101 ձայն, կորուստները փոխհատուցել է, երբ Էջմիածնի 22 տեղամասերից 19-ում պարտվել է եւ փոխհատուցել հարեւան Այգեկ գյուղից 96% քվեներով: Եվ այդպես՝ ամենուր: Հավատարժա՞ն է, որ տեղամասերի 80-90%-ում նույնական արդյունքներ գրանցող թեկնածուն մնացյալ 10%-ում բազմապատիկ ավելի ձայներ է ստանում:
Իհարկե, դա նշանակում է ընտրացուցակների եւ քվեաթերթիկների կեղծարարություն՝ տեղամասերի 10-20%-ում, ինչն էականորեն ազդել է ընտրությունների արդյունքների վրա եւ բավարար հիմք է՝ պահանջելու, որպեսզի ընտրությունները ճանաչվեն անվավեր: Ակնհայտ այդ կեղծարարությունը հնարավոր է ապացուցել ընտրողների ստորագրություններով, ցուցակների ու քվեաթերթիկների հետազոտմամբ, ինչի ուղղությամբ պատշաճ իրավական քայլեր ձեռնարկվում են:
Կարդացեք նաև
Ափսոսանք հայտնելով նշյալ 10-20% տեղամասերում «Ժառանգությունը» ներկայացնող ՏԸՀ անդամներին վիճակված ճնշումների, երբեմն դրանց դիմակայելու անկարողության առնչությամբ, 1900-ից ավելի տեղամասերում մեր հանձնաժողովականների ու շուրջ 800 վստահված անձանց բացարձակ մեծամասնությանն արժանին ենք մատուցում եւ շնորհակալություն հայտնում կատարած աշխատանքի համար: Նրանցից շատ շատերը, ովքեր Րաֆֆի Հովհաննիսյանի շտաբ էին գալիս կամ զանգահարում էին ուղղակի ասելու մեկ բառ՝ «Հաղթեցի», արդեն տալիս էին իրենց աշխատանքի գնահատականը: Մեծապես գնահատելի են այդ անձանց նվիրումն ու պայքարը Երեւանի արդյունքների, Գյումրիի, Վանաձորի եւ բոլոր մյուս հաղթանակների համար:
Շնորհակալություն ենք հայտնում հայաստանցի ընտրողին, որ, չնայած քաղաքական դաշտի իներտությանը, իր ակտիվությամբ օրինակ ծառայեց քաղաքական գործիչներին, կատարեց իր ընտրությունը եւ, մերժելով գործող վարչախմբին, ընտրեց Հայաստանի ապագան: Անգամ պաշտոնական տվյալներով՝ Րաֆֆի Հովհաննիսյանն այս ընտրություններում ստացավ ավելի մեծ թվով ձայներ, քան 1998-ից ի վեր նախագահի որեւէ ընդդիմադիր թեկնածու ստացել էր: Համաժողովրդական այդ քվեն պատգամ ու պարտավորություն է քաղաքական ընդդիմության համար՝ համախմբվելու եւ ժողովրդի կատարած ընտրությունն իրականություն դարձնելու:
«Ժառանգություն» կուսակցության լրատվական ծառայություն
Րաֆֆի, ճիշտ ես է, ճիշտ ես, բայց հայտնի բաները թող,ասա այն ինչ չգիտենք;Էդ Սերժը հարցրեց թե ինչու ես տխուր;Հասկանում եմ, ուզում էիր, որ դիմացդ առաջին տիկինը լիներ;Այլապես, ինչու* Սերժն անմիջապես շեշտեց, որ առաջին տիկինը չէ;Այդ մեկը բացատրեք, ես հասկանալ եմ ուզում; Չեմ ուզում մտածել, որ հողագնդի վրա ունեցածս միակ թշնամին հոգեկան հիվանդ է;Դեռ գործ ունենք, համաշխարհային գործ;