Քիչ առաջ քաղաքապետարանի առջեւ նստացույց անող Վահագ Մինասյանը զանգ ստացավ այսօր առավոտյան բերման ենթարկված ակտիվիստ, ակցիայի մասնակից Միհրան Մելքոնյանից: Սա նրա առաջին զանգի թույլտվությունն էր:
Միհրան Մելքոնյանն ասաց, որ ինքը գտնվում է Վանաձորի դատարանում եւ արագացված կարգով դատ են ուզում անել:
Բանն այն է, որ Միհրան Մելքոնյանը նախկինում դատվածություն է ունեցել, քանի որ խուսափել է բանակի ծառայությունից, բայց քանի որ օրինակելի վարք է դրսեւորել կալանավայրում, նրան ժամանակից շուտ ազատ են արձակել: Հիմա էլ Միհրան Մելքոնյանը վստահեցնում է, որ իրեն բերման են ենթարկել եւ ասում են, որ պետք է 6 ամսվա մեջ ներկայանայիր ոստիկանություն, ինչի չես արել: Մինչդեռ Միհրան Մելքոնյանը որեւէ ծանուցագիր ստացած չի եղել:
Այժմ նրան կես ժամ ժամանակ են տվել, որ դատավարությունը սկսվի, տրամադրել են հանրային դատապաշտպան, որից Միհրան Մելքոնյանը հրաժարվել է:
Կարդացեք նաև
Նա զանգել էր Վահագ Մինասյանին եւ խորհուրդ էր հարցնում՝ ի՞նչ անել: Վերջինս նրան խորհուրդ տվեց չստորագրել որեւէ բան եւ պահանջել, որ ամեն ինչ լինի իր փաստաբանի ներկայությամբ: Ակտիվիստները Միհրան Մելքոնյանի համար փաստաբան են փնտրում:
Հռիփսիմե ՋԵԲԵՋՅԱՆ
Հ. Գ. Ներկայացնում ենք նաեւ ՀՀ ոստիկանության պաշտոնական հաղորդագրությունը Միհրան Մելքոնյանի վերաբերյալ.
«Օգոստոսի 13-ին ոստիկանության Երևան քաղաքի վարչության օպերատիվ աշխատակիցները Երևանի քաղաքապետարանի մոտից բերման են ենթարկել ակցիայի մասնակիցներից մեկին` 1991 թ. ծնված, Սպիտակ քաղաքի բնակիչ Միհրան Մելքոնյանին:
Միհրան Մելքոնյանը 2011 թ. փետրվարի 17-ին Տավուշի մարզի ընդհանուր իրավասության դատարանի կողմից քրեական օրենսգրքի 362 հոդվածի 1-ին մասով՝ դասալքության համար, դատապարտվել է 3 տարի 6 ամիս ժամանակով ազատազրկման:
«ՀՀ Անկախության հռչակման 20-րդ տարեդարձի կապակցությամբ համաներում հայտարարելու մասին» որոշման հիման վրա նա Արագածոտնի մարզի ընդհանուր իրավասության դատարանի 2012 թ. դեկտեմբերի 27-ի որոշմամբ պայմանական-վաղաժամկետ ազատվել է պատժի կրումից և հաշվառվել ԱՊԿ բաժնի Լոռու բաժանմունքում: Սակայն այս տարվա ապրիլի 22-ից սկսած՝ բաժանմունք չի ներկայացել՝ միաժամանակ բացակայելով բնակավայրից:
Լոռու մարզի ընդհանուր իրավասության դատարանը հունիսի 21-ին որոշում է կայացրել դատապարտյալ Միհրան Մելքոնյանի նկատմամբ հետախուզում հայտարարելու վերաբերյալ:
Ոստիկանության Լոռու մարզային վարչության Սպիտակի բաժինը հուլիսի 2-ին, որպես պատժից խուսափող դատապարտյալի՝ Մելքոնյանի նկատմամբ հայտարարել է հետախուզում: Ձեռնարկվել են օպերատիվ-հետախուզական միջոցառումներ, և ստուգումներով պարզվել է, որ Միհրան Մելքոնյանը Սպիտակում վերջին անգամ եղել է այս տարվա ապրիլին:
Միհրան Մելքոնյանը իրավապահների տեսադաշտում հայտնվել էր դեռևս 2008 թվականին՝ գտնվել է հաշվառման մեջ հակահասարակական արարք կատարելու համար՝ Երևան քաղաքում նրա մոտ սառը զենք հանդիսացող դանակ էր հայտնաբերվել…
Միհրան Մելքոնյանը բերման ենթարկվելուց հետո հանձնվել է ոստիկանության Սպիտակի բաժնի ծառայողներին»:
