«Էրեբունի-Երևան 2795» տոնակատարությունների տոնական բեմերի կահավորման աշխատանքներին ծանոթանալու նպատակով Երևանի քաղաքապետ Տարոն Մարգարյանն աշխատանքային շրջայց է կատարել Էրեբունի և Կենտրոն վարչական շրջաններում:
«Էրեբունի» պատմահնագիտական արգելոց-թանգարանի հարակից տարածքում Տարոն Մարգարյանին են ներկայացվել «Երևանում տոն է» խորագիրը կրող համերգային ծրագրի մանրամասներն ու բեմական կահավորման աշխատանքները:
Տոնական միջոցառման մանրամասները ներկայացնելով քաղաքապետին՝ «Շարմ» ընկերության գլխավոր տնօրեն Կարեն Ղազարյանը նշել է, որ հոկտեմբերի 11-ին թանգարանի հարակից տարածքը կվերածվի ազգային երգ ու պարի հարթակի: Համերգային ծրագրի մեկնարկը կտրվի Արգիշտի արքայի ողջույնի խոսքով:
Կարդացեք նաև
Տեխնիկական վերջին շտկումներն են արվում նաև Հանրապետության հրապարակում տեղակայված տոնական գլխավոր միջոցառման բեմահարթակում:
Ամփոփելով աշխատանքային շրջայցի արդյունքները՝ քաղաքապետ Տարոն Մարգարյանը գոհունակությամբ նկատել է, որ «Էրեբունի-Երևան» տոնակատարությունն այսօր համաժողովրդական տոնի է վերածվել. ««Էրեբունի-Երևան» տոնակատարությունը երևանցիների համար դարձել է սպասված տոն: Արդեն ավանդույթ է դարձել նաև քաղաքի տոնը մեծ միջոցառումներով նշելը: Այս տարի երկու օր ենք նշելու՝ հոկտեմբերի 11-ին և 12-ին: Առաջին օրը «Էրեբունի» պատմահնագիտական արգելոց-թանգարանի հարակից տարածքից կտրվի տոնական միջոցառումների մեկնարկը և այդ տրամադրությունը կտարածվի ողջ Երևանում: Այսօր նախատոնական վերջին օրն է, ու մենք արդեն ավարտել ենք նաև մայրաքաղաքի տոնական ձևավորումը: Թիմը պատրաստ է Երևանում ապահովել տոնական մթնոլորտ ինչպես երևանցիների, այնպես էլ մայրաքաղաքի հազարավոր հյուրերի ու բոլոր այն մարդկանց համար, ովքեր սիրում են Երևանը: Օգտվելով առիթից՝ կցանկանայի բոլոր երևանցիներին հրավիրել քաղաքի օրվան նվիրված տոնակատարությանը և դառնալ Էրեբունի-Երևանի 2795-ամյակին նվիրված միջոցառումների անմիջական մասնակիցը»,- ընդգծել է Տարոն Մարգարյանը:
Երևանի քաղաքապետարանի տեղեկատվության և հասարակայնության հետ կապերի վարչություն
